Студенттік көктем жеңімпаздары марапатталды

2012 жылдың 30 наурыз күні Ө.А.Жолдасбеков атындағы студенттер сарайында әл-Фараби атындағы ҚазҰУ-дың ұйымдастыруымен жыл сайын өнерлі жастарды қолдау мақсатында өтетін «Студенттік көктем-2012» көркемөнерпаздар байқауының марапаттау рәсімі мен гала-концерті болды. Байқаудың мақсаты: білімгерлердің шығармашылығын дамытуға мүмкіндік беру арқылы, оларды тек сапалы маман ғана емес, жан-жақты, рухани дамыған, ұлтжанды тұлға етіп қалыптастыру.

«Студенттік көктем» фестивалі – жыл сайын университет көлемінде өтетін ауқымды іс-шаралардың бірі ғана емес, студенттердің әсерлі, қызыққа толы ұмытылмас мерекесі ретінде есте қалады.

«Студенттік көктем» байқауының гала-концертіне екі ай бойы іріктеу кезеңдерінен сүрінбей өткен 14 факультеттің жеңімпаздары қатысып, көрермендерді өз өнерлерімен баурап алды.

Әділ қазылар алқасының құрамында елімізге белгілі өнер жұлдыздары мен мәдениет қайраткерлері Біржан Хасанғалиев, Алма Аманжолова, Индира Расылхандар «Эстрадалық ән», «Дәстүрлі ән», «Халықттық би», «Заманауи би», «Классикалық би», «Музыкалық аспаптарда ойнау шеберлігі», «Авторлық шығармалар байқауы», «Ерекше жанр» номинациялар бойынша жеңімпаздарды марапаттады.

Өз кезегінде сөз алған ҚазҰУ ректоры Ғ.Мұтанов жастардың талантына шүбә келтірмейтіндігін айтып, студенттерді құттықтап, сәттілік тілеп, фестиваль бұдан да үлкен деңгейде болатынын айтты.

ҚазҰУ-дың Баспасөз қызметі