«Әл-Фараби- 2012» олимпидасының жеңімпаздарын марапаттау салтанаты

2012 жылдың 20 сәуір күні жыл сайын өтетін төртінші «Әл-Фараби- 2012» олимпидасының жеңімпаздарын марапаттау салтанаты Әл-Фараби атындағы ҚазҰУ-дың ректоры, академик, техника ғылымының докторы, профессор Мұтанов Ғалымқайыр Мұтанұлының қатысуымен өтті. Марапаттау рәсіміне Республикалық «Дарын» ғылыми-практикалық орталық директорының орынбасары А.Ә. Дүкенбаева, факультет декандары, қонақтар шақырылды. «Әл-Фараби» олимпиадасы Қазақстан Республикасы аумағында ғана емес, сондай-ақ алыс және жақын шет елдерде де кеңінен танымал бола бастады. Өзінің қысқа ғана қалыптасу тарихында бұл олимпиадаға 40 мыңнан астам жоғары сынып оқушылары қатысып, бағын сынады. Осындай ірі ауқымдағыірі жобаның бастамашысы әл-Фараби атындағы Қазақ ұлттық университетінің бұрынғы ректоры, бүгінде Қазақстан Республикасының Білім және ғылым министрі Жұмағұлов Бақытжан Тұрсынұлы. Әл-Фараби атындағы Қазақ ұлттық университетінің қазіргі ректоры, академик, техника ғылымының докторы, профессор Мұтанов Ғалымқайыр Мұтанұлы игі дәстүрді жалғастыра отырып, өзіндік жаңа леп те әкеле білді. Яғни, олимпиаданы екі кезеңдік етіп, алғашқы кезеңі ТМД және Қазақстан Республикасы ауқымында өткен онлайн тестілеуі болды.

Биылғы жылдың жеңімпаздар саны 36. Оның 12-сі І орын алды, олар Әл-Фараби атындағы ҚазҰУ-да оқуға ректордың грантын иеленді. ІІІ орынды иеленгендерге оқу ақысына 50%, ІІ орынға 25% жеңілдік беріледі.

Салтанатты марапаттау рәсімі «Әл-Фараби-2011» олимпиадасының І орын иегері , Экономика және бизнес жоғары мектебінің студенті Жұмағали Сұлтанның болашақ университет студенттеріне арналған тілек сөздерімен аяқталды.