"Қазақпарат" ұлттық ақпарат агенттігі

Алматыда «Жастар Президентпен бірге жарқын келешекке!» атты форум өтті

АЛМАТЫ. 22 қараша. ҚазАқпарат - Әл-Фараби атындағы ҚазҰУ-да 2000-нан аса студенттің қатысуымен «Жастар Президентпен бірге жарқын келешекке!» атты Қазақстан Республикасының Тұңғыш Президенті Күніне арналған форум өтті.

Бұл туралы аталмыш жоғары оқу орнының баспасөз қызметі хабарлады.

Елбасы Н.Назарбаев өзінің «Жас Отан» жастар қанатының II съезінде сөйлеген сөзінде еліміздің индустриялық-инновациялық дамуы және Отанымыздың қауіпсіздігі мен тұрақтылығын нығайту ісіне жастарды тартудың маңызы мен қажеттілігі туралы атап айтқаны белгілі.

Жастардың азаматтық, отансүйгіштік әлеуетін арттыру мен олардың тың бастамаларына қолдау көрсету мақсатында әл-Фараби атындағы Қазақ ұлттық университеті Алматы қаласы әкімдігінің қолдауымен форум өткізіп отыр.

Ашылу рәсіміндегі сөзіндеҚазҰУ ректоры Ғалым Мұтанов: «Бүгінгі форум тәуелсіздігіміздің тұғырын көтереді. Бұл тек ұлттық мереке емес, тәуелсіздігіміздің символы. «Түзу басшы ұзақ жолды қысқартады» деп Ахмет Байтұрсынов айтқандай, Елбасы 20 жылда көп еңбек етуде. Ел ертеңі жастар жарқын болашаққа батыл қадамдар жасайды деп сенемін, ертеңгі Қазақстан сіздерге байланысты. Елбасымен бірге - жаңа биіктерге», - деді.

«Бұл форум Елбасының сындарлы саясатын насихаттау, жастар арасында талқылау, Мемлекет басшысына деген сенімімізді білдіру. ҚазҰУ-дің Студенттер сарайында Алматы қаласы жастарының басын қосып отырмыз. Өз ойым, ел ертеңін қалыптастыру үшін, біз білімді де білікті маман атанып, мақтан тұтарлық тұлға болуымыз керек», - деген пікірін білдірді халықаралық қатынастар факультетінің 1 курс студенті Нұрсұлтан Орынбеков:

Алқалы жиынға республикалық жастар ұйымдарының көшбасшылары, халықаралық және республикалық байқаулар мен жарыстардың жеңімпаздары, президенттік және атаулы шәкіртақы иегерлері, түрлі салаларда табыстарға жеткен талантты жастардың өкілдері қатысып, өз ойларын ортаға салды. Форумға қатысушылар атынан Қазақстан жастарына арналған үндеу жолданды.

Форум аясында ҚазҰУ технопаркі түрлі салалардағы студенттік бизнес жобаларды дамыту мен жүзеге асыру үшін құрылған инновациялық инфрақұрылымдық алаң - университеттік студенттік бизнес-инкубатордың тұсаукесерін өткізді.