ҚазҰУ студенттері ақын Маралтай Райымбекұлымен кездесті
2013 ж. ақпанның 15-жұлдызында «Қаламымда тағдырымның кермегі» деген атаумен механика-математика факультетінің студенттері мен оқытушы-профессорлар құрамының Қазақстан Жастар Одағы, «Дарын» мемлекеттік жастар және Халықаралық «Алаш» әдеби сыйлықтарының лауреаты, ҚР Президенті грантының үш мәрте иегері, ақын Маралтай Райымбекұлымен кездесуі болып өтті. Жүздесуге басқа факультеттерде дәріс алып жатқан жастар да қатысты.
Автордың жыр жинақтарының, мерзімді баспасөзде жарияланған өлеңдерінің, оның шығармашылығы жайлы жазылған әріптестерінің сын материалдары мен оның бұқаралық ақпарат құралдарында жарияланған сұхбаттары мәтіндерінің, ел тұлғалары мен мемлекет, өнер және әдебиет қайраткерлерімен түскен фотосуреттерінің көрмесі ұйымдастырылды. Слайд-шоу мен студенттер дайындаған қысқа видеофильм көрсетіліп, тыңдармандарға ақынның өмірдеректері, шығармашылығы жайлы викториналық сұрақтар қойылды.
Ақынның өлеңдерін оқыған студенттер автордың қолтаңбасы қойылған кітаптармен марапатталды. Ал кеш кейіпкері өзінің әйгілі «Әдилә», «Алғашқы сезім», «Ай», «Игілік», «Ақшамда» атты өлеңдерімен қатар жаңа туындыларын да оқып, студенттер қойған және оларды ойландырып жүрген сұрақтарға қызықты жауап беріп, өзінің қоғамдағы құбылыстарға көзқарасын білдірді, пәк сезім, тылсым дүние жайлы ой-пайымдауларымен бөлісті.
Кездесуді тамашалаған жыр сүйер қауым ақынға, шараны ұйымдастырған ақпараттық жүйелер кафедрасының ұстаздары мен университет Ғылыми кітапханасының көпшілікпен жұмыс істеу секторына зор алғыстарын айтып тарасты.
Механика-математика фкультеті
