«Көмек» еріктілер ұйымы байқау өткізді

22 ақпанда ҚазҰУ студенттерінен құралған «Көмек» еріктілер ұйымы, мүмкіндігі шектеулі және жетім балаларға арналған мектеп-интернат тәрбиеленушілері арасында «Жарқын Жұлдыз» атты ән-би-аспаптық байқау өткізді.

Байқауға Алматы қаласындағы №1, №4, №6, №7, №8 интернаттар мен «SOS Алматы балалар қалашығы» тәрбиеленушілері қатысты. Үш түрлі өнер сайысында №4 мектеп-интернатының тәрбиеленушісі Думан Смақов «Жарқын Жұлдыз» номинациясына ие болды. Өз интернаттарына қолдау көрсетіп келген балалардан бастап, сайыскерлердің барлығына байқау соңында сыйлықтар таратылды. Байқауды өткізуге демеушілік жасап, көмек көрсеткен әл-Фараби атындағы ҚазҰУ-дың «Парасат» кәсіподағы мен «Сұңқар» студенттер кәсіподағына жүздеріне күлкі ұялаған балалардың алғыстары шексіз болды. «Көмек» еріктілері игі істерін жалғастырып, келешекте жаңа мерекелік концерттер мен бағдарламаларымен қуантпақ.

«Көмек» еріктілер ұйымы