Кәсіпкерлікте жетістікке жету жолдары

әл-Фараби атындағы ҚазҰУ-дың механика-математика факультетінде «Тәуелсіздік таңындағы жаңа тұлғалар» жобасы аясында Халықаралық сыйлықпен Ресейдің ең үздік кәсіпкері ретінде марапатталған отандасымыз Серікбай Бисекеевпен кездесу өтті.

Кездесуге ҚазҰУ-дың барлық факультет студенттері қатысты. Олар С. Бисекеевтің «Жетістік жолы» атты дәрісін тыңдап, өз сұрақтарын қоя отырып, күрделі деген сауалдарына жауап алды. Студент бола тұра, жастар бастаушы кәсіпкер екендерін атап өтті. «Мен жастарға қолжетімді білімді барынша ұтымды пайдалануға шақырамын, білімді адам ешқашан жұмыссыз болмайды. Өз идеяларыңды іске асыру жолдарын ойлап, жоспармен жұмыс істесеңдер, алар асу әлі алда», - деді жастарға С. Бисекеев. Кездесу барысында ҚазҰУ студенттерінің «Алгоритм» бизнес-инкубаторына барып танысты. Студенттер универсиитет тараптарынан кәсіпкерге естелікке имидждік тауар сағат пен қалам сыйға тартты.

Серікбай Бисекеев 2012 жылдың қорытындысы бойынша Ресейдің үздік кәсіпкері болып танылып, Ernst & Young ұйымдастырған кәсіпкерлік саласындағы беделді халықаралық сыйлықпен марапатталды. Ол – тек қана Ресейде емес, бүкіл әлемде бәсекеге қабілетті танымал жоғары технологиялы өнім шығаратын ірі корпорация құрған азамат. Компания В2В саласындағы жоғары технологиялы шешімдерге әлемдік көшбасшы болып табылады.

Кездесу әл-Фараби атындағы ҚазҰУ, Қазақстанның жас кәсіпкерлері қауымдастығы ұйымдастыруымен өткізілді. Белді де беделді тұлғамен жастар қауымының ашық пікір алмасуы, жетістікке жету жолындағы құпияларды біліп, болашақта тәжірибе барысында білікті қолдана алуы, жастардың жеке кәсіпкерлікке байланысты көкейіндегі сауалдарға жауап алу болып табылады.

ҚазҰУ-дың Баспасөз қызметі