"Қазақпарат" ұлттық ақпарат агенттігі

ЕКАТЕРИНБУРГ. 11 қараша. ҚазАқпарат - Әл-Фараби атындағы ҚазҰУ Екатеринбургтегі Қазақстан және Ресейдің аймақаралық ынтымақтастығының Х форумының жұмысына қатысты.

ҚазҰУ ректоры, академик Ғалым Мутанов бастаған делегация құрамында ғалымдар, ҒЗИ және ғылыми орталықтардың директорлары, факультет декандары, университет оқытушылары мен студенттері бар, деп хабарлады жоғары оқу орнының баспасөз қызметінен.

Мерейтойлық форумда ашылған өнеркәсіп көрмесінде ҚазҰУ өзекті ғылыми-технологиялық бағыттар бойынша: нано- және биотехнология, дәстүрлі және баламалы энергетика, ақпараттық технологиялар және қауіпсіздік, қоршаған ортаны қорғау, медицина, сондай-ақ, университеттің «Spin-off» компаниялары шығаратын өнімдер үлгілері бойынша өз инновациялық жұмыстарын ұсынды. ҚазҰУ экспозициялары форумға қатысушылардың тарапынан үлкен қызығушылыққа ие болды. Олармен Свердловск облысының губернаторы Евгений Куйвашев, ҚР Білім және ғылым министрі Аслан Сәрінжіпов, екі елдің министрліктері мен ведомстволары өкілдері, өнеркәсіптік кәсіпорындар басшылары, ЖОО-ларының ректорлары танысып, ЖОО-ның ғылыми-инновациялық әлеуетіне жоғары баға берді.

Форум жұмысы барысында әл-Фараби атындағы ҚазҰУ және Ресейдің тұңғыш президенті Б.Н.Ельцин атындағы Орал Федералдық Университеті ректорларының кездесуі өтті. Тараптар ғылыми-білім беру саласындағы ынтымақтастықтың келешегін талқылап, бірлескен жобаларды іске асыру туралы бірқатар келісімдерге қол қойды. Екі университет «жасыл экономиканы» және инновацияларды дамыту, ғалымдардың ғылыми және тәжірибелік-құрастыру жұмыстарын өндіріске енгізу, оқытушылар мен студенттермен академиялық алмасуды белсенді жүргізу бағытында күш біріктіруде.

Сондай-ақ, қазақстандық оқу орнының ғалымдары форумның секциялар және панелдік сессиялары жұмысына қатысты, ал студенттер «ХХI ғасырдағы көшбасшылық және инновациялар: болашаққа көзқарас» жастар форумына қатысты.