7 ақпан күні Журналистика факультетінде ақын Мұқағали Мақатаев шығармашылығына арналған «Жырлап келдім өмірге...» атты әдеби-драмалық кеш өтті.
Кеш барысында қазақ поэзиясының көгіне қанатты жырларын қалықтатқан, Хантәңірдің мұзбалағы, Мұқағали ақынның ел мен жер, махаббат жайлы өлеңдері оқылып, «Аққулар ұйықтағанда» поэмасына композициялық көрініс қойылды. 1-курс студенті Төлепберген Еламан «Арыз жазып кетейін» өлеңінің желісімен Мұқағали рөлін сомдауы сәтті, әрі тартымды шықты. Кейіпкер бейнесін бере білді.
Ақынның шығармашылығы мен өмір жолы туралы деректі фильм көрсетіліп, көрермендерге қызықты сұрақтар қойылды. Сонымен қатар домбырамен Балымбетов Бөкенбай ақынның «Есіңе мені алғайсың» әнін, ал Аққайыр Жадыра «Саржайлау» әнін нақышына келтіре орындады.
Кеш соңында факультет деканы, профессор Ө.Әбдиманұлы кешті ұйымдастырушы бірінші курс студенттеріне алғысын білдіріп, рухани мұраларымызды әрдайым қадірлеп, қастерлеп жүру қажеттігін айтып, жастарға шығармашылық шабыт тіледі. Кешке қатысқан кафедра меңгерушілері Г.Сұлтанбаева, С.Медеубекұлы, куратор-эдвайзерлер Б.Әсембаева, Ә.Әлімжанова да рухани-шығармашылық кешке қатысушы талантты студенттерге тек сәттілік тіледі.
Шоқтығы биік шығармашылық шыңына қарап бой түзеген жас ақындардың қаламы қарымды болсын демекпіз!
Баспасөз және электронды БАҚ кафедрасы
Басқа жаңалықтар
