Пікірсайыс клубында жаңа маусымның ашылу

Оқу ордамыздағы алғыр ойлы, сөзге шешен жастарға арналған «Алтын сапа» пікірсайыс клубында жаңа маусымның ашылу салтанаты болып өтті...

Сөз өнері - дертпен тең

Адамзаттың санасымен қатар дүние есігін ашқан сөз өнері қашан да өнер атаулының ең қиыны мен күрделісі, мұралардың асылы мен қымбаты ретінде бағаланады. Ал көсем сөз, көрікті ой тек көркем көңілден шығатынын ескерсек, ордалы оқу орнымызда тіл қаруымен қаруланған жастардың көп болуы тегін емес тәрізді. Қасиетті қара шаңырағымызда ақылмен ойлап, алғыр сөйлеп, шаршы топтың алдында сөз бастаған жастарымыздың басын біріктіретін «Алтын сапа» пікірсайыс клубы соның айқын дәлелі іспетті.

«Алтын сапа» пікірсайыс клубы 2007 жылдан бастап университет көлеміндегі барлық пікірсайыс қозғалыстарын бір арнаға тоғыстырып, жұмысын жүйелеген болатын. Осы сәттен бастап әр факультеттің «жүзден жүйрік, мыңнан тұлпар» жастары біріге отырып, тек ҚазҰУ көлемінде ғана емес, Алматы қаласы, тіпті республикалық, халықаралық деңгейдегі пікірсайыс сапасын арттыруға сүбелі үлесін қосып келеді.

Өткен оқу жылында«Алтын сапа» пікір-сайыс клубы үлкен жетістіктерге жетіп, ҚазҰУ-дың зияткерлік дәрежесі мен саяси, экономикалық, мәдени, әлеуметтік саладағы білім деңгейін көрсете білді. Клубтағы пікір-сайысшы студенттер өздерін бар жақсы қырларынан танытып, киелі қара шаңырағымыздың өзге жоғарғы оқу орындарының арасында шоқтығы биік екендігін тағы да бір дәлелдеп өтті. Нақтырақ айтсақ, өткен оқу жылының өзінде Болашақ РҚ пен Азамат пікір-сайыс клубының кубогіне, Халықаралық бизнес университетінің кубогіне, Абай атындағы ҚазҰПУ 80-жылдығына, Халықаралық бизнес Академиясының кубогіне, Тұран тәуелсіз университетінің кубогіне, ҚазҰМУ-нің «Диоген-2009» кубогіне арналған пікір-сайыс турнирлерінің бас жүлдегерлері атанды. Осы орайда «Алтын сапа» пікір-сайыс клубы мүмкін деген барлық турнирлердің жеңіс тұғырынан көрінгенін атап өту керек.

Баршамызға мәлім, «Хабар» және «Ел арна» телеарналарынан жыл бойы «Азамат жастар парламентінің» жоғарғы оқу орындарының арасында байқауы өткен болатын. Бұл байқауда ҚазҰУ студенттері Астанада өткен ақтық мәреге жолдама алып, ҚазҰТУ университетінің студенттерінен оқ бойы озып жеңімпаз атанды. Телебағдарламаның қазіргі жобаларында да біздің пікірсайысшылар орынды ойын өрнегін көрсетіп, еліміздің өзге аймақтарының білімгерлеріне дес бермей келеді.

Сонымен қатар, біздің студенттер ҚР Парламентінде қоғамдық көмекші жобасында да белсенділік танытты. Бұл жобаның аясында жастарымыз депутаттардың жанында іс-тәжірибеден өтіп, білімділігі мен біліктіліктерін шыңдап қайтты.

«Ат тұяғын тай басар» дегендей, қазіргі таңда клубтың тәжірибелі пікір-сайысшылары артынан ерген өрімдей жастарды сөз өнеріне баулып, ұрпақтар сабақтастығын жалғастыруда. Соның дәлелі ретінде үстіміздегі оқу жылындағы қыркүйек айының 15-жұлдызында клубтың жаңа маусымының ашылу салтанаты өтті. Алғашқы жиналыстың өзінде-ақ клуб табалдырығын жаңадан аттаған жас пікірсайысшылар айрықша белсенділік танытып, болашағынан зор үміт күттіретін азаматтар екенін байқатты. Жалпылама таныстықтан соң білімгерлер түрлі тақырыптарды қызу талқылап, тәжірибелі пікірсайысшылардан Американдық парламенттік үлгідегі пікірсайыс форматтарын үйренуді бастады.

Алдағы уақытта да клуб ұжымы жас пікірсайысшыларға шешендіктің шыңына шығудың құпияларын ашып, сөз өнерін меңгертуге барлық күш-жігерін жұмсамақ. Университетіміздің пікірсайысшыларын халықаралық, республикалық деңгейдегі ең үздік көсемсөзшілер қатарына қосу үшін түрлі психологиялық тренингтер, тәлімдік кездесулер, ЖОО арасында жолдастық ойындар мен тұрақты пікірсайыстар өткізіліп тұрады. Сонымен қатар, біздің пікірсайысшыларымыз кез келген дәрежедегі сайыстарға белсенді қатысуға, «Азамат жастар парламенті» телебағдарламасында өз пікірін білдіру мүмкіндігіне ие. Тек бір мамандықтың шеңберінде шектеліп қалмай, кез келген саладағы тақырыптарды талдап үйреніп, қоғамдағы соңғы өзгерістер мен жаңалықтардан хабардар болу жастарымызға еліміздің болашақ интеллектуалды элитасына қосылудың бірден-бір жолы болып табылады.

Адамзаттың аса құдіретті құралдарының бірі - сөз қаруына - иелік еткісі келетін әрбір отансүйгіш жас азамат үшін «Алтын сапа» пікірсайыс клубының есігі әрдайым ашық!

ҚазҰУ-дың қалықтап ұшқан қырандары мен қырмызыдай құлпырған қызғалдақтарының арасында ойға жүйрік, сөзге шешен азаматтар көп болғай!

Жидебекқызы Ақнұр

8702 66 00337