«Философия» мамандығын таныстыруға арналған кездесу

Кеш барысында мектеп директоры Әділ Әбілдәұлы, оқытушылар Бақыт Сәрсенбайқызы мен Фарида Оспанова дайындаған оқушылар ақынның өлеңдерін тамылжыта оқыды. Арнайы шақырылған қонақ, қазақтың белгілі ақыны Сейфолла Оспанов өзінің қаламдасы, құрдасы Өтежан Нұрғалиев жайлы, жалпы поэзияға байланысты терең де тағылымды ойларын ортаға салып, сол дәуірдің тарихы, әдебиеті, мәдениетіне панорамалық шолу жасап, кешегі мен бүгін, келешек арасындағы байланысты көркем әрі ғылыми тілде асқан шеберлікпен ашып берді.

Кеш соңында Философия кафедрасының меңгерушісі, философия ғылымдарының докторы, профессор Гүлжиһан Нұрышева биыл 80 жылдық белеске шыққан әл-Фараби атындағы Қазақ ұлттық университетінің атқарып отырған жұмыстары мен жеткен жетістіктері, Философия әлемінің болмысы мен мамандық таңдаудың қыр-сыры туралы ойларымен бөлісті.

Балалар да, кездесу қонақтары да қарт-ақын мен философ ғалымдардың өнегелі де өрелі әңгімелерінен кереметтей рухани әсер алып шықты.