Даму кезеңдерінің куәсі болған университет
80 жылдық тарихы бар білім ордасы бүгінгі күні еліміздегі қоғам өмірі мен білім, ғылым саласының қалыптасуы мен дамуы кезеңдерінің куәгері болып келеді. Осы жылдар ішінде көптеген істер атқарылып, жылдан-жылға ұстаздардың білім беру сапасын арттыру, студенттердің білімге деген құлшынысын одан әрі дамыту үшін түрлі жобалар пайда болды.
– Кез келген жан өмірде қандай із қалдырамын деген ойды есте берік ұстауы керек. Небір ізгі ниеттерді жастар бойына қалыптастыру арқылы өркениетке қол жеткіземіз. Өркениет арқылы, алған ілім-білімдерді жақсы іске жұмсау арқылы, тәрбиеге ден қою арқылы елді, ұлтты дамытамыз. Міне, «Айналаңды нұрландыр!» жобасының негізгі діттегені де осы, – дейді ректор Ғалымқайыр Мұтанов.
Қазақ Ұлттық университеті тағы бір үлкен жобаны қолға алды. «ҚазҰУ студенттері оқуға тиіс жүз кітаптың» тізімі жасалды. Рухы мықты ел ешқашан кедей болмайды, рухы биік мемлекет ешқашан құлдырамайды. Өзінің ұлттық құндылығын бағаламаған ұлттың болашағы бұлыңғыр. Бұл жүз кітапты тек филология мен журналистика факультетінің студенттері ғана емес, барлық мамандық студенттері оқуға тиіс. Олар өз саласына қатысты кітаппен ғана шектеліп қалмай, көркем шығарма оқып, жандүниесін байытса, ұлтына пайдалы, жақсы маман шығады.
Әрине, жаза берсек, университетіміздің атқарып жатқан жұмыстары аз емес. Сонымен қатар, үлкен мақтанышпен айтатын жәйттердің бірі, баршамызға белгілі, 2013 жылы Ұлыбританияның рейтингтік агенттігінің зерттеу қорытындысы бойынша әл-Фараби атындағы ҚазҰУ әлемнің ең үздік дамыған 800 университетінің ішінде 299-орынды иеленді.
Бүгінгі таңда университет ұжымы Елбасының алға қойған тапсырмаларын орындауда, 30 дамыған елдер қатарына ену жолында аянбай еңбек етуде. Себебі, Тәуелсіздігіміздің баянды болуында өсіп келе жатқан жастарға тиісті деңгейде білім беру, ғылымға тарту, оқытуда әл-Фараби атындағы Қазақ Ұлттық университетінің рөлі өте зор және де өзімнің осындай білім ордасында ұстаз ретінде жұмыс істейтінімді мақтан тұтамын!
Гүлзира ОРАЗЫМБЕТОВА,география ғылымдарының кандидаты, доцент.
2013 жылы Ұлыбританияның рейтингтік агенттігінің зерттеу қорытындысы бойынша әл-Фараби атындағы ҚазҰУ әлемнің ең үздік дамыған 800 университетінің ішінде 299-орынды иеленді.
Басқа жаңалықтар
