Ресей клубының кезекті мәжілісі

2010 жылдың 13 ақпанында сағат 13.00, механика-математика факультетінің актік залында Ресейлік клуб шеңберінде Қазақстанның Еуропада Қауіпсіздік және Ынтымақтастық ұйымына төрағалық етуіне арналған іс-шара өткізілді. Ұйымдастырушылар – филология факультетінің орыс тілі кафедрасының оқытушылары (доц. Қиынова Ж.К., доц. Аманбаева Ю.К., доц. Бузело А.С.) және 1 курстың қазақ бөлімінің студенттері.

Іс-шараның максаты – ЕҚЫҰ-ның атқаратын қызметіне түсінік беру, патриоттық рух тәрбиелеу, студенттердің азаматтық мәдениетін көтеру және олардың корпоративтік рухын қалыптастыру; ҚР президентінің «Интеллектуалды ұлт - 2020» бағдарламасына сәйкес Отанға, елге қызмет ететін, бәсекеге қабілетті азаматтарды тәрбиелеу.

1 бөлім – Қазақстанның ЕҚЫҰ-да атқаратын қызметін көрсету (слайд-бағдарлама). Студенттердің өз күшімен дайындаған слайдтар ұсынылды. Олар ЕҚЫҰ-дың тарихы, осы ұыймның атқаратын қызметі туралы мәліметтерді айтып түсіндірді және Қазақстанның Еуропада Қауіпсіздік және Ынтымақтастық ұйымына төрағалық етуіне себеп болған жағдайларға тоқталып, Астанада өтетін саммит туралы баяндады.

2 бөлім – 1 курстың қазақ бөлімі студенттері дайындаған концерттік бағдарлама. Осы бөлім студенттердің Қазақстанның гимнын орындауымен ашылды. Концерттің негізін патриоттық ән мен өлеңдер орындау («Отан», «Туған жер», «Атамекен», «Қазақстан», «О, қазақ тілі») құрады. Сонымен қатар Қазақстанда тұратын ұлттардың би өнерлері де ортаға салынды.

Аталып өткен іс-шара шеңберінде «2010 - Қазақстанның Еуропада Қауіпсіздік және Ынтымақтастық ұйымына төрағалық ету жылы», «Қазақстандағы ұлттар бірлігі – ел берекесі», «Процветай, мой Казахстан» т.б. тақырыптар бойынша газет конкурсы ұйымдастырылды.