ҚазҰУ Студенттік баспасөз орталығы өз жұмысын бастады

ҚазҰУ-дің журналистика факультетінде Студенттік баспасөз орталығының алғашқы отырысы өтті.

Басқосуда сөз алған журналистика факультетінің деканы С.Медеубекұлы орталық жұмысының жемісті болуын тілеп, құттықтау лебізін білдірді. ЮНЕСКО, халықаралық журналистика және қоғаммен байланыс кафедрасының меңгерушісі филология ғ.д., профессор Н.Шыңғысова Студенттік баспасөз орталығы ҚазҰУ студенттері мен БАҚ өкілдерінің арасындағы алтын көпір болатындығына сенім білдіріп, студенттердің кәсіби шыңдалуына үлкен мектеп болатынын жеткізді. Отырыста ҚазҰУ-дың баспасөз қызметі мен университеттің «Қазақ университеті» газетінің өкілдері орталықтың аталмыш бөлімдерімен тығыз қарым-қатынаста болып, белсенді әріптестік қатынас орнату қажеттігін айтты. ҚазҰУ Жоғары Студенттік Кеңесінің төрайымы А.Дәдінова университет имиджін нығайту мақсатында жарияланған студенттердің мақалаларына шолу жасап, орталықтың ашылу маңыздылығына тоқталды. Оның айтуы бойынша, университеттік «SmartCity» бағдарламасы мен ҚазҰУ студенттерінің өмірі жайлы ақпараттар талапкерлерді осы ЖОО-нын таңдауына қызығушылығын тудырмақ.

Студенттік баспасөз орталығының мақсаты – университет қабырғасында өткізілетін республикалық деңгейдегі шаралар, жастар мен студенттер өмірінде болып жатқан жаңалықтарды БАҚ-та жариялау болып табылады. Студенттік баспасөз орталығы журналистика факультетінің студенттері үшін кәсіби тәжірибеден өтуге жақсы мүмкіндік бермек. Орталықта журналистика факультетінің студенттерімен қоса өзге факультеттердің қаламы қарымды студенттері өз білімін жетілдіріп, шығармашылығын шыңдай алады.

Басқосуда студенттер дайындаған телесюжеттер мен радиохабарлар ҚазҰУ теле-радио кешені арқылы оқу орнындағы ғимараттар мен жатақханаларға таратылып, ал, жазылған мақалалар «Қазақ университеті» газетінде, сондай-ақ, республикалық бұқаралық ақпарат құралдарында жарияланаты айтылды. Орталық қалалық және де республикалық көлемдегі БАҚ-пен кәсіби қарым-қатынас орнатуды қолға алмақ. Сондай-ақ баспасөз орталығында апта сайын белгілі қоғам қайраткерлері, ақын-жазушылар, БАҚ өкілдері, шоу-бизнес майталмандарымен кездесулер ұйымдастыру жоспарланып отыр.

Жаңалық күтіңіздер!

Студенттік баспасөз қызметі