Вебинарда ауқымды тақырып қамтылды
![](/storage/news/220060019865155da78be0a296742768_004.jpeg)
География және табиғатты пайдалану факультетінің Метеорология және гидрология кафедрасында еліміздегі маңызды тақырыптардың біріне орай, «Қазақстандағы климаттың өзгеруіне және оның салдарына қарсы күрес жөніндегі ағымдағы және жоспарланатын шаралар» тақырыбында тұрақты даму мақсаттары бойынша вебинар өтті.
Метеорология және гидрология кафедрасы ұйымдастырған вебинардың негізгі мақсаты климаттың өзгеру мәселесіне, оның салдарымен күресуге жоспарланатын шаралар туралы ауқымды тақырыптарды қамтыды. Климаттың өзгеруі адам өмірінің көптеген аспектілеріне ықтимал әсерін ескерсек, бүгінде бұл – дамудың маңызды мәселелерінің бірі.
Осы орайда, спикер, ҚазҰУ докторанты Зуфар Тоқпаев «Қазақстандағы климаттың өзгеруіне және оның салдарына қарсы күрес жөніндегі ағымдағы және жоспарланатын шаралар» тақырыбында өз жұмысын ұсынды. Онда климаттың өзгеруінің алдын алуда Қазақстан БҰҰ-ның Климаттың өзгеруі туралы негіздемелік конвенциясының, оған Киото хаттамасының және 2021 жылдан бастап Киото хаттамасын алмастыратын Париж келісімін ұстанатынын, парникті газдардың тасталымдарын азайту үшін қабылданған шаралар, сонымен қатар дамыған энергетика, ауыл шаруашылығы, көліктерден шығарылатын қалдықтарды азайтуға арналған шаралар мен жоспарланған іс-әрекеттер туралы жан-жақты айтып өтті.
Вебинарға қатысушылар да өздерін мазалаған сұрақтарға жауап алып, конференция соңы пікірталасқа ұласты.
Вебинарды аяқтай отырып, Метеорология және гидрология кафедрасы меңгерушісінің ғылыми-инновациялық жұмыс және халықаралық байланыстар жөніндегі орынбасары, география ғылымының кандидаты Айман Нысанбаева Қазақстандағы климаттың өзгеруі мен оның салдарына қарсы күрес жұмыстарының маңыздылығын атап өтіп, дәрісті қорытындылады.
Айкерім КЕРІМҚҰЛ,
Метеорология және
гидрология кафедрасының
оқытушысы