Студенттік баспасөз орталығы студенттер белсенділігін арттырды

18 наурыз күні Студенттік баспасөз орталығының кезекті мәжілісі өтті. әл-Фараби атындағы Қазақ ұлттық университеті Студенттік баспасөз орталығының мақсаты — университеттің және оның факультеттері мен өзге де құрылымдарының қызметін, онда өткізіліп жатқан түрлі шараларды ішкі және республикалық бұқаралық ақпарат құралдарына жариялау, студенттердің белсенділігін арттыру арқылы келешекте олардың да білікті маман болып кемелденуін қамтамасыз ету болып табылады.

Баспасөз орталығына студенттерді мүшелікке қабылдау рәсімі студенттерге ерекше қуаныш сыйлады. Өздерін тілші ретінде сезінген студенттер әл-Фараби атындағы Қазақ ұлттық университетінің имиджін қалыптастыруға бағытталған жұмыстарды ықыласпен атқаратындығын жеткізді.

Орталықтың студенттер арасындағы жетекшісі Алмас Маратұлы баспасөз орталығының осы уақытқа дейінгі жүзеге асырған жұмыстары туралы есеп берді. Университет өміріндегі түрлі іс-шаралар бұқаралық ақпарат құралдарында, сайттарда және «Қазақ университеті» газетінде жарияланып келеді. Орталықтың логотипі, ақпараттарды бір орталыққа жинайтын электронды адресі бар. kaznu.studpresscentre@gmail.com электронды поштасына келіп түскен мәліметтер орталық тілшілеріне беріліп, мақала түрінде бұқаралық ақпарат құралдарына жіберіледі. Мұның бәрі жаңа заманға сай, бәсекеге төзімді білікті журналист мамандар ұрпағы кемелденіп келе жатқанын аңғартады.