Кітапхана – оқырман үшін үлкен тәрбие мектебі, сансыз сұрақтардың жауабын табуға болатын сиқырлы да киелі орда. Осынау ғылым мен техниканың дамыған заманында оқырман мен кітапты байланыстыратын алтын көпір кітапхана болса, сол мәдени мекеменің қиындығы мен қызығын бірге арқалап еңбек етіп, оқырманның рухани талап-тілегін қанағаттандырып, білім шуағын шашып жүрген біздің кітапханашылар.
Білім мен ғылымның, өнер мен мәдениеттің дамуына өлшеусіз үлес қосып, рухани құндылығымызды көздің қарашығындай қорғап, насихаттап, ел игілігіне жаратып жүрген еңбегі көп елене бермесе де, қоғам мен мемлекеттің дамып, өркендеуіне өте қажет әрі маңызды мамандық екенін ешкім жоққа шығара алмайды.
Әл-Фараби кітапханасы – 2 миллионнан аса кітап қоры және толық мәтінді электронды ресурстары бар елдегі ең ірі университеттік кітапхана. Университеттің 16 факультетінде оқитын 25 мың бакалавр мен магистранттарға, докторанттарға және 3000 оқытушы-профессорлық құрам мен қызметкерлерге оқу-тәжірибе, ғылыми-зерттеу үдерістерінде ақпараттық-кітапханалық қызмет көрсетуде. Күнделікті жаңа келген газет-журналдар, жаңа кітаптар және күн сайын келіп кітап алып жатқан оқырмандар, студенттер, оқытушылар, қызметкерлер легі толастамайды. Кітапхана қызметкерлері оқырмандарға сапалы қызмет көрсете отырып, өз білігін арттыру мақсатында отандық және шетелдік түрлі онлайн семинарлар мен ғылыми конференцияларға қатысып отырады.
Республика күніне орай, Әл-Фараби кітапханасында мерекелік іс-шара өтті. Осы іс-шарада университеттің Басқарма Төрағасы – Ректоры Ж.Түймебаев Республика күнімен құттықтап, жетістіктерімізді атап өткені кітапхана ұжымын марқайтып тастады. Университеттің дамуына белсене араласып, отандық білім мен ғылымның өркендеуіне қосқан айрықша үлесі үшін Ақпараттық қызмет көрсету басқармасының бас кітапханашы-менеджері А.Айдарханова «Ерен еңбегі үшін» медалімен, Қорды жинақтау және сервистік қолдау басқармасының басшысы Г.Есләмғалиева Құрмет грамотасымен, бас кітапханашы-менеджерлер М.Шомаева, М.Жаманкөзева, М.Нұрымбетова Алғыс хатпен марапатталды.
Республика күнімен қатар келген Кітапханашылар күнінде Әл-Фараби атындағы ҚазҰУ «Парасат» кәсіподақ ұйымының қолдауымен ұжымда мерекелік іс-шара ұйымдастырылды. Кітапхана директорының орынбасары Ж.Арекенова әріптестерін кәсіби мерекемен құттықтап, ҚазҰУ Басқарма мүшесі – ғылыми-инновациялық қызмет жөніндегі проректор Ж.Айтжанованың және кітапхана әкімшілігінің атынан А.Ерекеш, Қ.Көбегенова, Қ.Сағымбаева, Г.Шымырбаева, А.Кункаев, А.Мұқанова, А.Балқашева, Б.Әзімхан, М.Құсайынов, М.Тағаева, А.Қожахметова Алғыс хатпен марапатталды.
Қалима ТОЛЫМБЕК,
Әл-Фараби атындағы кітапхананың кітапханашы-менеджері, магистрант
