ҚазҰУ ғалымдары Еуропа баспаларында сегіз монография жариялады

Әл-Фараби атындағы ҚазҰУ ғалымдары Қауіпсіздік пен ынтымақтастық мәселелерін зерттеу институты шеңберінде профессор Қ.И.Байзақованың жетекшілігімен «Қазіргі геосаяси шындықтар және олардың Орталық Азия жастары арасында діни радикализм идеяларының таралуына әсері: жаңа трендтер және халықаралық тәжірибе» жобасы бойынша зерттеу жұмыстарын жүргізуде.

 Ғалымдар осы саладағы халықаралық тәжірибе мен жаңа трендтерді ескере отырып, трансұлттық діни экстремистік ұйымдардың Орталық Азия елдерінің жастарына идеологиялық ықпалының таралу себептерін анықтауға бағытталған кешенді ғылыми зерттеу жүргізді және өңірлік пен ұлттық қауіпсіздік жүйесін қалыптастыратын ҚР мемлекеттік құрылымдары үшін ұсыныстар дайындады. Зерттеу жұмыстары Қазақстанның Ғылым және жоғары білім министрлігінің жобалары бойынша жүргізілуде.

«Бұл жоба Орталық Азия елдерінің қаржы саласындағы, трансшекаралық сауда мен логистикадағы, су-энергетикалық және басқа салалардағы мәселелерді шешудегі тиімді ынтымақтастығын қамтамасыз ету үшін ұсынымдар әзірлеу мақсатында іске асырылуда», – деп атап өтті профессор Құралай Байзақова.

Әл-Фараби жанындағы ҚазҰУ-дың Қауіпсіздік пен ынтымақтастық мәселелері институтының ғалымдары Гавр Нормандия университетінің (Франция) шетелдік әріптестерімен, Еуропалық қауіпсіздік мәселелерін зерттеу орталығының зерттеушілері Дж. Маршалл және басқалармен бірлескен халықаралық жобаларды жүзеге асыруда.

Мәселен, «Еуропа-Азия» бірлескен 15 халықаралық конференция мен «Логистика және дипломатия» атты халықаралық семинар және бірқатар дөңгелек үстелдер өткізілді. Осы аталған ғылыми жиындардың барлығы Әл-Фараби атындағы ҚазҰУ, Гавр Нормандия университетінде, сонымен қатар Корея, Моңғолия, БАӘ мемлекеттеріндегі серіктес университеттерде өткізілді.

Профессорлар Қ.И.Байзақова,  Ф.Т.Кукеева, К.Н.Макашева Париждегі Азия және Тынық мұхиты елдерінің үш конгресіне қатысып, Қазақстанның халықаралық қатынастардың қазіргі заманғы мәселелері бойынша ұстанымын ашып атап өтті.

Бірлескен ғылыми жобалардың қорытындысы бойынша Питер Ланг, ЕМС және т.б. еуропалық баспаларда сегіз ұжымдық монография жарияланды. «Бұл монографиялар қазіргі заманғы халықаралық қатынастардың кең ауқымды мәселелерін, оның ішінде геосаяси турбуленттіліктің Орталық Азия елдеріне әсерін, біздің өңірде «жаңа өңіршілдікті» қалыптастыру мәселелерін, ЕО-ның Орталық Азия үшін жаңа стратегиясы шеңберінде Қазақстанның Еуропалық одақтағы стратегиялық әріптестігін; «Бір белдеу – бір жол» бастамасы шеңберінде Қытаймен ынтымақтастықты, Қазақстанның көлік-логистикалық мүмкіндіктерін жетілдіру перспективаларын және т.б. көрсетеді», – деп атап өтті жоба жетекшісі Қ.Байзақова.

Ғылыми зерттеулердің негізгі бағыттары: Қазақстанның сыртқы саясатындағы екіжақты және көпжақты қатынастар; өңірлік интеграция процестері; өңірлік қауіпсіздік мәселелері; Қазақстан Республикасының  ШЫҰ, АӨСШК, ЕО, ЕҚЫҰ, НАТО және т.б. халықаралық ұйымдармен ынтымақтастығы.

Осы ғылыми зерттеулердің нәтижелері қазақстандық ғылым үшін өңірлік қауіпсіздік, өңірлік интеграция, көпжақты ынтымақтастық мәселелерін зерттеу бойынша жаңа талқылауларды ашады.

Әл-Фараби атындағы ҚазҰУ-дың Баспасөз қызметі