ҚазҰУ журналы Қазақстан Республикасы Білім және ғылым министрлігі Білім және ғылым комитеті ұсынған басылымдар тізіміне енді

әл-Фараби атындағы Қазақ ұлттық университетінің «Ашық жүйелер эволюциясындағы мәселелер журналы» Қазақстан Республикасы Ғылым және жоғары білім министрлігінің Ғылым және жоғары білім беру сапасын қамтамасыз ету комитеті ұсынған басылымдар тізіміне қосылды. Бұл тізімге бұрын ҚазҰУ-дың 20 ғылыми журналы енгізілген.

«Ашық жүйелер эволюциясындағы мәселелер журналы» 2003 жылы құрылған және ашық тепе-теңдік емес динамикалық табиғи жүйелердің пайда болуы және эволюциясы мәселелері бойынша ғылыми зерттеу нәтижелерімен ғылыми қоғамдастықты таныстыру мақсатында мақалалар жариялайды. Журналдың негізгі міндеті – ғылымның әртүрлі салаларындағы ашық тепе-тең емес динамикалық жүйелердің эволюциясы физикасының мәселелері бойынша зерттеулерді дамытуды ынталандыру. Бұл зерттеулер физиканың іргелі заңдарына негізделген макро және микро әлемнің эволюциялық бейнесін құру үшін қажет.

«Ашық жүйелер эволюциясындағы мәселелер журналы» 2023 жылғы маусымда Қазақстан Республикасы Білім және ғылым министрлігінің Ғылым және жоғары білім беру сапасын қамтамасыз ету комитеті ұсынған басылымдар тізіміне журналдарды қарауға, бағалауға және енгізуге хат жолдаған. Тәуелсіз сараптамалық бағалау нәтижелері бойынша журнал қазіргі уақытта халықаралық талаптарға баламалы 15-тен астам критерий бойынша бағаланды және Комитет ұсынған ғылыми қызметтің негізгі нәтижелерін жариялау үшін жарияланымдар тізіміне енгізілді.

Ғылым және жариялау белсенділігі басқармасы