«Шынықсаң – шымыр боласың» демекші, дене жаттығуы адам баласына қашанда пайдалы. Күні бойы өзіңді сергек сезініп жүрудің бір тәсілі – спорт. Ғалымдар зерттеуіне сүйенер болсақ, спорт адамды шат-шадыман өмір сүруге де жетелейді екен. Дені сау ұрпақ тәрбиелеу – бүгінгі маңызды міндеттердің бірі. Таза әрі саф ауа мен көрікті табиғат аясына жиі саяхат жасау және спорттық ойындар ұйымдастыру көтеріңкі көңіл күй мен денсаулыққа пайдасы зор.
ЖОО-ға дейінгі білім беру факультеті Жоғары оқу орнына дейінгі дайындық кафедрасының тұрақты даму мақсаттары (ТДМ-3) аясында және «Өлкетану», «Парасат» клубтарының ұйымдастыруымен білім алушы жастарға салауатты өмір салтын насихаттау мақсатында топ тыңдаушылары арасында «Спорт – денсаулық кепілі» ұранымен «Медеу» мұзайдынында конькимен мұз үстінде мәнерлеп сырғанаудан және 800 сатылы баспалдақпен жүгіріп шығу бойынша кіші жарыс өтті.
Спорттық шараның басты мақсаты – болашақ денешынықтыру пәнінің мамандығын таңдайтын тыңдаушыларға спорт саласына жасайтын алғашқы қадамы әрі шетелден келген тыңдаушылардың қоғамға үйренісуі. Сондай-ақ салауатты өмір салтын насихаттау. «Медеу» мұзайдыны – әлемдегі 150-ден аса үздік спорттық рекордтар мекені. Көптеген отандық кинолардың тарихында қалған, «Азия дауысы» сияқты халықаралық ән байқауы жайында талай тарихи іс-шараларға мұрындық болғанын тыңдаушылар білуі керек. Бұл шараның тағы бір мақсаты – Медеу тарихымен таныстыру, өзара достық қарым-қатынасты қалыптастыру, тыңдаушы-студенттер бос уақытын тиімді пайдалану, іс-шараларға жұмылдыру.
«Медеу» мұзайдынындағы жарыстың жалғасы өлкетануға саяхат жасаумен ұласты. Медеудің керемет көркем табиғатын тамашалап, көңілді демалыстан рухани азық алған шетелдік тыңдаушылар атамекенге деген сағынышын әнмен, өз туындыларын арқау еткен жырмен жеткізіп, «Медеу» мұзайдынында серуендеп, коньки теуіп, демалыс күндерін қызықты өткізді.
Гүлнәзира МУЖИГОВА,
Сандуғаш НҰРТІЛЕУОВА,
ЖОО-ға дейінгі дайындық кафедрасының аға оқытушылары
Басқа жаңалықтар
