«Поэзия! Менімен егіз бе едің?» атты әдеби-сазды кеші

Жоғары оқу орнына дейінгі дайындық кафедрасында университетіміздің 90-жылдығына арналған мәдени-әдеби онкүндіктің аясында ақын Мұқағали Мақатаевтың туған күніне орай «Поэзия! Менімен егіз бе едің?» атты әдеби-сазды кеші өтті. Кеш «Поэзия әлемі» әдеби кафесінде ұйымдастырылды. Кафе қонақтары, ақын шығармашылығынан өзі қалаған өлеңге, әнге, күйге тапсырыс берді. Даяшылар қабылдаған тапсырыс бойынша, жүргізушілер нөмірді жариялап тұрды. Жоғары оқу орнына дейінгі дайындық кафедрасының тыңдаушылары, колледж, мектеп студенттері өз кезегімен шығып өнерлерін паш етті. Кеш соңында қонақ болған ұстаздар алғыстарын айтып, алған әсерлерімен бөлісті. 
Сабақтың мақсаты
Білімділік: ғасырлар тоғысында туып, ғасыр ақыны атанған Мұқағали Мақатаевтың ақындық талантын шәкірт жүрегіне ұялату, сол арқылы олардың бойында поэзия әлеміне, жалпы сөз өнеріне деген сүйіспеншілікті берік қалыптастыру.    
Дамытушылық: Оқушының сөз мәдениеті дұрыс меңгеріп, жырларды мәнерлеп оқуға, өленді өміріне серік еткен ақынға еліктеп ақынжанды болып өсуіне кең жол ашу, рухани танымын кеңейту.
Тәрбиелік: Туған халқының талантты ақынына, әдебиетіне, туған еліне деген сүйіспеншілік сезімін оятып, адамгершілікке тәрбиелеу.
Қаншама жылдар өтсе де өміршеңдігін жоймай келе жатқан ақынның шығармашылығын кез келген жастағы қазақ баласы сүйіп оқиды. Аталмыш кештің өтуі соған бұлтартпас дәлел болды.