Мейрамбек Байзақ: Азия кубогында намысты қолдан бермедік
– Мейрамбек, жастар арасында өткен қол күресінен Азия кубогының жүлдесін иелендіңіз. Бұл байқау қайда өтті?
– 2023 жылғы армрестлингтен Азия кубогы Өзбекстанның Самарқан қаласында өтті. Жарыстың жоғары деңгейде өткенін айтқым келеді. Жарыста Азия құрлығынан жиналған кіл мықтылар бақ сынасты.
– Қарсыластарыңыз жайлы не айтар едіңіз?
– Менің қарсыластарым көршілес өзбек, қырғыз елінен болды. Сонымен қатар өз еліміздің де спортшылары бар. Әрине, барынша намысты қолдан бермеуге тырысып, күміс жүлдегер атанып қайттық.
– Байқауға дайындаған бапкеріңіз бар шығар?
– Әлбетте, бапкерсіз болмас. Осы спортқа алғаш қадам басқаннан алдымен жақсы спортшыдан бұрын, жақсы адам болу керектігін бойымызға сіңірген ағайымыз Дәулет Тұрсынқұловқа ерекше алғысымды білдіргім келеді. Университет қабырғасында өз білгенімен бөлісіп жүрген Лаура апайыма үлкен рақмет.
– Хоббиіңіз қандай?
– Хоббиім – табиғат аясында серуендеу, пайдалы подкастар тыңдау. Арасында бильярд ойнап тұратынымыз бар.
– Физика-техникалық факультетінің 4-курс студентісіз. Мамандығыңызды қалауыңыз бойынша таңдадыңыз ба?
– Мамандық таңдауда басқа да нұсқалар болғанын жасырмаймын, бірақ дәл осы мамандыққа түскеніме еш өкінбеймін. Бұйыртса, мамандық бойынша жұмыс істеу ойда бар.
– ҚазҰУ туралы не айтар едіңіз?
– Университетім жайлы ойлағанда алғаш тілге тиек ететін нәрсе – көрсе көз тоймайтын жалынды жастарға толы әдемі қалашық, өзіндік «вайбы» бөлек, креативке толы студенттік өмір және менің алтын достарым. Университетіміздің білім беру деңгейі ауыз толтырып айтарлықтай жоғары деңгейде.
Сұхбаттасқан
Бағдат СҰЛТАН
Басқа жаңалықтар
