ҚазҰУ-да Ұлттық Студенттік лиганың ашылу салтанаты өтті

ҚазҰУ-да ҚР Білім және ғылым министрі Аслан Сәрінжіповтың қатысуымен футболдан Ұлттық Студенттік лиганың ресми ашылу салтанаты өтті. Іс-шараға ҚР Білім және ғылым министрі Аслан Сәрінжіпов, ҚазҰУ ректоры Ғалым Мұтанов, сонымен қатар Алматы ЖОО ректорлары, оқытушылары мен студенттері қатысты.

Әл-Фараби атындағы ҚазҰУ-дың спорт кешені алаңында «Көктем-Күз 2015» чемпионатының күзгі бөліміне аймақтық іріктеу кезеңі басталды. ҚР Білім және ғылым министрі Аслан Сәрінжіпов ойыншыларды турнирдің басталуымен құттықтап, сәттілік тіледі. «Еліміз үшін жастардың денсаулығы маңызды мәселелердің бірі. Осы тұрғыдан келгенде, ұйымдастырушылар өте үлкен жұмыстар атқарып отыр. Сіздерге үлкен рахмет! Құрметті қатысушылар, бүгінгі ойын тартысты әрі қызықты өтсін. Бастысы көңіл-күйлеріңіз көтеріңкі болсын», - деп Аслан Бәкенұлы жылы лебізін білдірді.

Турнирді әл-Фараби атындағы ҚазҰУ-дың «Арлан» командасы мен Халықаралық Ақпараттық технологиялар Университетінің «IT Legion» командасы бастады. Ойын Халықаралық Ақпараттық технологиялар Университетінің жеңісімен аяқталды, есеп 0:2. Алғашқы минуттардан ҚазҰУ командасы қарсылас команданың қақпасына шабуылдар жасады. «Айтишниктердің» епті қақпашысының арқасында доп қақпаға бірде бір рет кірмеді. Қонақ команда алаң иелерінің қақпасына тек соңғы минуттарда ғана шабуыл жасап, 2 рет гол соқты.

«Көктем-Күз 2015» чемпионатының күзгі бөлімінің аймақтық іріктеу кезеңіне Алматы қаласының жоғары оқу орындарынан 10 команда: әл-Фараби атындағы ҚазҰУ, Қ.И. Сәтбаев атындағы ҚазҰТУ, SDU, ALMU, ҚазҰАУ және тағы басқа университеттер қатысады. Дәл осындай іріктеу ойындары Астанада, Шымкентте және Қарағандыда өтіп жатыр. Ұлттық Студенттік лиганың финалы қарашаның соңына қарай Алматыда өтеді.

Футболдан Ұлттық Студенттік лига 2007 жылы ҚР Білім және ғылым министрі Аслан Сәрінжіпов пен Қазақстан футбол Федерациясының бас хатшысы әріптестік туралы Меморандумға қол қойылған кезде құрылған. Келісімшартқа сәйкес екі жақ бірігіп, аймақтық, республикалық деңгейде білім беру ошақтарында турнирлар ұйымдастырып отырады. Өткен жылы ҚазҰУ командасы финалдық ойында Гумилев атындағы ЕҰУ-не «алтынды» беріп, өздері күміс жүлдені қанағат тұтқан еді.

Әл-Фараби атындағы ҚазҰУ-да спорттың 30-дан аса түрімен жаттығуға мүмкіндік жасалған. Ағымдағы жылы жүзу бассейнінің құрылысы басталды. Жүзу бассейні студент жастардың жүзуге деген қызығушылығын арттыруға септігін тигізеді. Және ҚазҰУ өзінің территориясында жүзуден жаттығулар мен жарыстар ұйымдастыруға мүмкіндік алады.

Спорттық жарыстарда биылғы жаз ҚазҰУ жастары үшін өте жемісті болды. Естеріңізде болса, Кванджуда(Оңтүстік Корея) өткен Бүкіләлемдік жазғы Универсиадада біздің студенттер 4 «алтын» және 1 «қола» жүлдені қанжығаларына байлаған болатын. Ал Астана қаласында өткен Дзюдодан әлем чемпионатында 60 келі салмақ категориясында ҚазҰУ студенті Елдос Сметов алтын медальді иемденді.