ҚазҰУ-дың механика-математика факультетінің Механика кафедрасында «Тұрақты даму мақсаттары» жобасының аясында «Идеядан – бизнеске» деген тақырыппен ғылыми-танымдық іс-шара өтті. Факультеттің Ө.Жолдасбеков атындағы залында өткен кездесуді Механика кафедрасының 1-курс докторанттары А.Ошманова, М.Рахметоллақызы, А.Көмекбаев, А.Боранбаева және Сюй Пэнъюе педагогикалық практика аясында кәсіби бағдар беру мақсатында ұйымдастырды. «Идеядан – бизнеске» атты бұл кездесуге кафедраның 1-4 курс бакалавр және 1-2 курс магистратура студенттері, Механика кафедрасының меңгерушісі Д.Туралина және факультет деканының орынбасары Н.Досжан, педагогикалық практика жетекшісі А.Төлепбергенов қатысты.
Тұрақты даму мақсаттарында тұтас қоғамның алдында тұрған өзекті мәселелер толық қамтылады. Онда кедейлікті жою, мықты денсаулық және әл-ауқат, сапалы білім беру, құрлық экожүйелерін сақтау және т.б. тақырыптар бар. Осы мәселенің бәрі талқылана келіп, сегізінші мақсат ретінде көрсетілген «Лайықты жұмыс және экономикалық өсу» бағыты біз таңдап алған «Идеядан – бизнеске» деген тақырыпқа сай келді. Студенттердің алған білімі, оқыған ілімі теориялық негіздемелер болып келеді. Ал оның түпкі мақсаты өмірде қолданып, жүзеге асырумен нақтыланады. Алдымен адамға санасында пайда болатын идея жетекшілік етеді. Одан кейін батылдық пен тәуекел бас көтереді. Осы қасиеттердің барлығы адам бойында жинала келе, қаракетке, іс-қимылға айналғанда ғана бизнес туындайды. Әрине, бизнес ашу оңай іс емес. Мұны анық сезген докторанттар өткізіп отырған сабағымыз студенттер мен магистранттарға ұғынықты болу үшін әрі жанды әсер етуін көздеп арнайы екі қонақ шақырдық. Бұл басқосу студенттердің кәсіби салада, еңбек бағытында өзін-өзі жетілдіріп, жоспарын жүзеге асыруына серпін береді. Іс-шара барысында тұрақты даму мақсатына сәйкес, орнықты экономикалық өсімге қол жеткізу мән-жайы және өнімді жұмыспен қамту мәселесі, сондай-ақ баршаға лайықты жұмыс істеуге жәрдемдесу тенденцияларын талқылау сәтті ұйымдастырылды.
Кездесуге келген екі бизнес өкілінің бірі Дидар Болтаев – @distantia.kz, @1kurspro.official компанияларының негізін қалаушы. Дидар елде магистратураға түсе алмай қалған студенттерге өзінің «distantia.kz» атты оқу орталығында онлайн түрде көмек беру жұмысын жүргізеді. Студенттер құжаттар тапсырып, сол орталықта сынаққа қатысады. Жоғары бағамен өткендері оқуға қабылданады. Оқу мерзімі аяқталған соң, дипломдарын қорғау үшін «distantia.kz» көмегімен тақырыптары бойынша таңдалған елдің жоғары оқу орнына барып, дипломдарын қорғайды.
Екінші қонағымыз – Нұрым Әбдіхалықов. Ол да Energymaх.group компаниясының негізін қалаған іскер азамат. Көптеген оқу орталықтарын ашқан кәсіпкер. Қарағандылық Нұрым бірнеше жыл бұрын шағын ғана бір орталық ашқан еді. Ол жиған білімін айналымға салып, оқу орталықтарын бұл күнде 14-ке жеткізіпті. Ағылшын тілін жақсы білетін анасының көмегімен батыл қимылдар арқылы жол тауып, жетістіктерге жетіп отырған талантты жас табыскер іскерге айналып отыр. Ол да заманының бизнес-коучер деңгейіне жеткен адам. Кәсіппен айналысқысы келетіндер одан кеңес алып, ақыл сұрайды. Бизнесін ұлғайтқысы, табысын еселей түскісі келетін жандарға орталығы арқылы орынды, үйлесімді бағыт-бағдар көрсетеді.
«Идеядан – бизнеске» деген бұл жолғы дәріс студенттердің ойына ой қосып, дамудың, өсудің соқпағына назар аудартты. Кездесу соңы сұрақ-жауапқа жалғасып, көтерілген тақырып төңірегінде құнды мәлімет ортаға салынды. Әсіресе қос бизнесмен бұл күнге жеткенше басынан не өтті, қандай кедергілерге кездесті, оны қалай жеңді – сол туралы баяндап, жастарға ерекше мотивация берді.
Мөлдір САПАРОВА,
Механика кафедрасының 1-курс докторанты
Басқа жаңалықтар
