ҚазҰУ ректоры инженерлік педагогика саласындағы халықаралық ұйымның жоғары дәрежелі марапатына ие болды
АСТАНА. ҚазАқпарат - Флоренцияда инженерлік педагогика тақырыбы аясында өткен (20-24 қыркүйек, 2015) 44-халықаралық «IGIP» (Халықаралық инженерлік педагогика саласындағы қоғамы) конференциясында әл-Фараби атындағы ҚазҰУ ректоры Ғ.Мұтанов IGIP Senior Member атты жоғарғы дәрежелі марапатқа ие болды. Бұл туралы университеттің баспасөз қызметінен хабарлады.
IGIP Президенті, профессор М. Ауер посткеңестік кеңістікте алғашқы болып осы атаққа ие болған ғалымға арнайы марапатты табыстай отырып, профессор Ғ.Мұтановтың жаһандық инженерлік білім беру мен педагогика саласындағы елеулі орны мен қажырлы еңбегін атап өтті.
«IGIP Senior Member» құрметті атағы - әлемдік білім беру кеңістігінде кәсіби маман ретінде еркін қызмет жасауға мүмкіндік беріп, өз ісіңнің хас шебері екендігін өзгелерге танытатын инженерлік білім беру мен педагогика саласындағы жоғары лауазым.
Халықаралық «IGIP» ұйымы 1972 жылы құрылған болатын. Бүгінгі таңда мекеме инженерлік пәндерді оқыту мен әдістемесінің ғылыми дамуын басты назарға алған мақсатты 130 елді біріктіріп отыр.
Осы ретте, халықаралық бақылау комитетінің қолдауымен және «IGIP» президентінің шешімімен ҚазҰУ-да Орталық Азиядағы инженерлік педагогика саласындағы халықаралық ұйымының сертификатталған орталығы ашылғанын атап өту керек.
Қазақстандық IGIP тренинг орталығында біліктілік талаптарына сай (ING-PAED IGIP) оқытушылар дайындау жүзеге асырылады. «Инженерлік ЖОО халықаралық оқытушысы» атағын алған маман арнайы реестрге қосылып, сол арқылы ЕуроОдаққа мүше елдерде танылуға мүмкіндік алады.
Басқа жаңалықтар
