Қазақ ұлттық университетінің 90 жылдығы аясында Фараби кітапханасы мен Жоғары оқу орнына дейінгі дайындық кафедрасының жанынан құрылған «Жас ғалым» клубымен бірлесе отырып «Бабырнама» және қазақ руханияты» атты дөңгелек үстел өтті. Тұрақты даму мақсаттарының «Сапалы білім» бағдарламасы аясында өткен шарада кітапхана қорындағы Захир ад-Дин Бабырдың «Бабырнама» еңбегі таныстырылып, оның Қазақстан тарихы, ғылымы мен әдебиетінде алатын орны жан-жақты қарастырылды.
Дөңгелек үстел барысында сөз алған Жоғары оқу орнына дейінгі дайындық кафедрасының оқытушысы, ф.ғ.к. Г.Тастемірова ғылыми кітапханадағы инновациялық өзгерістер, әлемдік тәжірибе алмасу және тарихтағы ақтаңдақтарға объективті баға беруде кітапхана қорындағы деректерді пайдаланудың тиімді мәселелері жөнінде ой қозғады. Негізгі баяндамашы, кафедраның аға оқытушысы, Шараф Рашидов атындағы Самарқан мемлекеттік университетінің докторанты М.Ибрагимова Қазақстан тарихы бойынша деректер мен сирек кітаптардың электронды нұсқасы жайында сөз қозғап, «кітапхана ісі дұрыс жолға қойылмай, ғылымның дамуы мүмкін емес» деп атап өтті. Дөңгелек үстелдің негізгі тақырыбы Бабырдың адамзат руханиятына қосқан зор үлесі – «Бабырнама» атты тарихи шығармасы екеніне тоқталды. Аталған еңбектің қазақ әдебиеті мен тарихына да қатысы барын ескере отырып, Захир ад-Дин Бабырды қазақ әдебиетінің түпкі бастауларының біріне жатқызуға болатыны жайында өз пікірін ортаға салды.
Дөңгелек үстел барысында зерттеушілер, ғалымдар мен кітапхана ісінің мамандары өзара пікір алмасып, бір-біріне сауал қойып, көкейкесті сұрағына жауап алуға мүмкіндік туды. Іс-шара барысында бас кітапханашы-менеджер Қ.Көбегенова Фараби кітапханасына экскурсия жүргізсе, Ақпараттық қызмет басқармасының басшысы А.Джаманкозева кітап көрмесімен таныстырды. Университеттегі білім алушы жастарға қазақтың тарихи мұраларын насихаттау мақсатында ұйымдастырылған дөңгелек үстел мазмұнды өтті.
Гүлхан ТІЛЕУЖАНОВА,
Жоғары оқу орнына дейінгі дайындық кафедрасының
оқытушысы
Басқа жаңалықтар
