Экожүйелерді қалпына келтіру мәселелері талқыланды

Әл-Фараби атындағы ҚазҰУ-да университеттің 90 жылдығына және БҰҰ-ның тұрақты даму жөніндегі «Академиялық ықпал» бағдарламасының жаһандық хабы мәртебесін алудың 10 жылдығына арналған «Климат күтпейді» атты халықаралық жобасы басталды.

Ауқымды жоба XCSS қауымдастығымен бірлесіп ұйымдастырылған. Оған белгілі қазақстандық және шетелдік ғалымдар, сарапшылар, көрнекті қоғам қайраткерлері, Әл-Фараби атындағы ҚазҰУ мен Қазақстанның жоғары оқу орындарының басшылығы мен профессор-оқытушылар құрамының өкілдері қатысады.

ҚазҰУ-дың Басқарма мүшесі – операциялық қызмет жөніндегі проректоры Еркін Дүйсенов құттықтау сөз сөйлеп, аталған жобаның маңыздылығына тоқталды.

«Әл-Фараби атындағы ҚазҰУ үкіметпен орнықты даму саласындағы көшбасшылармен және қоғамдық қорлармен серіктестікте жұмыс істей отырып, QS Sustainability көрсеткіштерін растайтын қоршаған орта мен климатқа байланысты төтенше жағдайға өзінің институционалдық ден қоюында үлгілі болып табылады. Біз табиғатты қорғауда, қалпына келтіруде және жақсартуда маңызды рөл атқаруға тырысамыз», – деп атап өтті проректор.

Іс-шарада сондай-ақ Францияның Алматы қаласындағы бас консулы Фабрис Неве, XCSS-cross country SKIING Sand қауымдастығының президенті Эстель Пейен, Қазақстан халқы Ассамблеясының Франциядағы достық елшісі Малгожата Туар, Орталық Азия үшін БҰҰ Қоршаған орта жөніндегі бағдарламасының (ЮНЕП) субөңірлік кеңсесінің басшысы Айдай Құрманова және басқалар сөз сөйледі.

Құрметті қонақтар Қазақстан-Қытай қашықтықтан зондтау және қолдану технологиясы зертханасы мен Тұрақты даму және табиғатты ұтымды пайдалану ғылыми орталығына барды.

Ауқымды іс-шара бағдарламасында «Мәдениеттер мен дәстүрлер: Қазақстандағы орнықты даму тіректері»  көрмесі, шеберлік сыныптары, «Qazaq-Oner» қолөнершілер орталығының тұсаукесері, «Алтынемел» ұлттық паркінің әуен шығаратын үлкен барханындағы спорттық-экологиялық тур және «Климат күтпейді» атты ғылыми-тәжірибелік конференциясы және т.б. ұйымдастырылды.

Қазақстан халқы Ассамблеясының Франциядағы достық елшісі Малгожата Туар қолдаған «Климат күтпейді» жобасы БҰҰ-ның экожүйелерді қалпына келтіру жөніндегі онжылдығының бір бөлігі екенін атап өткен жөн. XCSS қауымдастығы (cross country SKIING SAND) – БҰҰ-ның   Климаттың өзгеруі жөніндегі хатшылығы ресми түрде бақылаушы ұйым ретінде танылды. Жоба экотуризмді ілгерілетуге және климаттың өзгеруіне бейімделу үшін шалғай аудандардың пайдалы мүмкіндіктерін көрсетуге бағытталған.

Әл-Фараби атындағы ҚазҰУ Баспасөз қызметі