Білім бәйгесінде топ жарды

Л.Гумилев атындағы Еуразия ұлттық универси­те­тінің журналистика және саясаттану факультеті Баспасөз және баспа ісі кафедрасының ұйымдас­ты­руымен ҚР жоғары оқу орындарының «Баспа ісі» білім беру бағдарламасы бойынша оқитын сту­дент­тер арасында VII республикалық студенттік пән олимпиадасы өтті.

Сайысқа Еуразия ұлттық университетінен «Күлтегін», «Көкжиек», Әл-Фараби атын­дағы ҚазҰУ-дан Дәрмен Сма­йыл мен Нұрлыайым Да­на­еваның жетекшілігімен «Жәр­дем», «Шұғыла» топтары қатысып, бақ сынасты. Білім жарысының басты мақсаты – болашақ баспагер, редак­тор­лардың кәсіби һәм шы­ғар­машылық білім-білігін арт­тыру, үздік студенттерді анықтау, танымын кеңейту.

Студенттерге әділ төрелік еткен қазылар құрамында Қазақстан жазушылар одағы Астана қаласы филиалының директоры, ақын Дәулет­ке­рей Кәпұлы, ЕҰУ баспасының директоры Телғозы Жұ­ман­алин, «Фолиант» баспасының бас редакторы Фарида То­ба­шалова болды.

Сайыс шымылдығын ашып берген ЕҰУ-дың журналис­ти­ка және саясаттану факуль­те­тінің деканы Қайрат Өмір­бай­ұлы жарыстың негізгі мақ­сатын түсіндіріп, баспа ісі­нің келешегін сөз етсе, ка­федра меңгерушісі Аман­гел­ді Шурентаев пен аға оқы­тушы Гүлжазира Ертасова са­йысқа қатысушыларға сәт­тілік тіледі.

Олимпиада төрт кезең бо­йынша өтті. Атап айтар бол­сақ: таныстыру, алдын ала бекітілген тақырыптар бо­йын­ша инфографикалық ди­зайн жұмыстары, баспа ісінің негізгі пәндерінен тест сұ­рақ­тары және редакциялау. Белгіленген кезеңдер бо­йын­ша әр команда тапсыр­ма­ларды ұтымды орындап, тапқырлық танытты.

Сонымен қатар ұйым­дас­ты­рушылар студенттерді ЕҰУ-дың бас корпусындағы музеймен таныстырды. Онда біз­дің заманымызға дейінгі тарихи жәдігерлер, тасқа қашалған жазулар, Күлтегін ескерткіші, басқа да мұралар сақталған. Көздің жауын ала­тын құндылықтарға студент­тер таң-тамаша болды. Сон­дай-ақ Л.Гумилев атындағы ЕҰУ жанында орналасқан (Абылай хан даңғылы мен Ақ­бұлақ өзені бойындағы «Бел­асар» көпірі арасында) Ұс­таз­дар саябағына да шолу жасалды.

«Жүйріктен жүйрік озар жарысқанда» дегендей, са­йыс нәтижесінде Әл-Фараби атындағы Қазақ ұлттық уни­верситетінің журналистика факультеті Баспагерлік-ре­дак­торлық және дизайнерлік өнер кафедрасының сту­дент­терінен құралған «Жәр­дем» құрамасы жеңімпаз атан­ды. Екінші орынды Л.Гу­милев атындағы ЕҰУ-дың «Күл­тегін» командасы, ал үшін­­ші орынды тағы да ҚазҰУ-дың «Шұғыла» құра­ма­сы иеленді.

Сайыс жеңімпаздарын әділқазылар алқасы уни­вер­ситет ректорының атынан арнайы дипломмен мара­пат­тап, естелікке кітап сыйлады.

Динара БОРАНБАЙ,

журналистика факультетінің 4-курс студенті