Бірінші курс студенттерімен танысу шаралары өтті

Әл-Фараби атындағы Қазақ ұлттық университетінде жаңа оқу жылының алғашқы күні басталды. Биыл еліміздегі көшбасшы жоғары оқу орнын 7228 білім алушы таңдады. Оның ішінде бакалавриатқа – 5974, магистратураға – 771, докторантураға – 483 студент түсті.

Университеттегі алғашқы күнінде білім алушы жастармен министрлік өкілдері және ҚазҰУ басшылығы еркін форматта кездесу өткізді.

Жүздесуде ҚР ҒЖБМ Жоғары және жоғары оқу орнынан кейінгі білім комитеті төрағасының орынбасары Ақерке Абылайхан  сөз сөйлеп, студенттердің алдағы жаңа оқу жылына сәттілік тіледі.

Өз кезегінде әлеуметтік даму жөніндегі проректор міндетін атқарушы Сәбит Суатай ҚазҰУ-дың Басқарма Төрағасы – Ректор Жансейіт Түймебаевтың құттықтауын жеткізді. Проректор Әл-Фараби атындағы Қазақ ұлттық университетін таңдағаны үшін студенттерге ризашылығын білдірді. Сондай-ақ өз сөзінде ҚазҰУ-дың бүгінге дейін жеткен жетістігі туралы айтып, болашақта білім алушы жастардың игілігі үшін жасалатын жұмыстарға тоқталды.

«Әл-Фараби атындағы ҚазҰУ зерттеу мәртебесіне ие. Оқу ордасында дәріс алып жүріп, ғылыммен терең айналысуға мол мүмкіндік бар.  ҚазҰУ әлемдік рейтингте 163-орында. Бұл университетте жүргізілген нәтижелі жұмыстардың көрсеткіші. Елді дамыту үшін алдымен сапалы білім алып, білікті маман болуларыңыз қажет. Жаңа оқу жылында сіздерге табыс тілеймін», – деді проректор.

Сонымен қатар Білім күніне орай, әр факультет декандары факультетке оқуға түскен бірінші курс студенттерімен кездесіп, жаңа оқу жылының басталуымен құттықтады.

«Мен 9-сыныптан бері Әл-Фараби атындағы ҚазҰУ-ға оқуға түсуді армандадым. 11-сыныпты бітіргеннен кейін география және табиғатты пайдалану факультетінің «Экология» мамандығына оқуға түстім. Арманым орындалды. Экология саласы еліміз үшін өте қажетті. Сол себепті осы мамандықты таңдадым.  Болашақта өз ісімнің маманы болуға дайынмын», – дейді Айкен Әбілқасым.

Айта кетейік, ҚазҰУ қалашығындағы жатақханаларда да бірінші курс студенттері үшін таныстық шаралары ұйымдастырылуда. Жастарға білім ордасының тарихына қатысты викториналық сұрақтар қойылып, ән кеші өткізілді.

Әл-Фараби атындағы ҚазҰУ-дың Баспасөз қызметі