ҚИЫР ШЫҒЫС КАФЕДРАСЫНДА «ЧУСОК» МЕЙРАМЫ ЖӘНЕ ЖОҒАРЫ КУРС СТУДЕНТТЕРІ МЕН БІРІНШІ КУРС СТУДЕНТТЕРІНІҢ КЕЗДЕСУІ ӨТТІ

2024 жылдың 19 қыркүйегінде әл-Фараби атындағы Қазақ ұлттық университетінің шығыстану факультетінің Қиыр Шығыс кафедрасында Алматыдағы Корея Республикасының Білім беру орталығының қолдауымен «Чусок» және «Сонбе мен хубе арасындағы кездесу» іс-шаралары өтті. «Чусок» – корей халқының ең ірі ұлттық мерекелерінің бірі, ол ай күнтізбесі бойынша 15 тамызда атап өтіледі. Бұл мереке күзгі жиын-терім кезеңімен сәйкес келіп, молшылық пен игіліктің символы ретінде корей халқы үшін үлкен маңызға ие және олардың ұлттық мәдениеті мен тарихын көрсетеді. «Сонбе мен хубе арасындағы кездесу» – жаңа студенттерді аға буынмен таныстыруға бағытталған кафедраның дәстүрлі іс-шарасы. Іс-шараға Қиыр Шығыс кафедрасының (корейтану бөлімінің) 1-4 курс студенттері қатысты. Мереке кафедра меңгерушісі Абаған А.-ның құттықтау сөзімен басталып, студенттерге «Чусок» мерекесінің мәні қысқаша түсіндірілді. Студенттер дәстүрлі корей тағамдары «сонпён» және «инджольми»-ден дәм татты, кейін музыкалық қойылымдарға (к-поп билері, әндер, домбырада ойнау және т.б.) қатысты. Іс-шара «ханбок» киімінде естелікке суретке түсумен аяқталды. Бұл іс-шараның студенттер үшін корей мәдениетімен танысып, өзара достықты нығайтудың ұмытылмас тәжірибесіне айналатынына сенімдіміз.