«Қазақстан халқының тілдері күні» апталығы аясында жоғары оқу орнына дейінгі білім беру факультетінің Шетелдіктердің тілдік және жалпы білім беру дайындығы кафедрасының оқытушылары шетелдік студенттерге «Тіл – өлшеусіз қазына, өрісі кең әлем» тақырыбында іс-шара өткізді.
Кафедраның оқытушылары мереке жайында, тілдің мәні туралы шетелдік студенттерге түсіндіріп, бейнежазба, танымдық тапсырмалар, тілдің құдіреттілігіне байланысты музыкалық шығармалар ұсынды.
Өткен іс-шараның жалпы мақсаты – шетелдік студенттердің мемлекеттік тілді және басқа да тілдерді үйренуіне, тілдің әлеуметтік-коммуникативтік қызметін кеңейтуге арналды. Сондай-ақ тіл байлығын дамытуға байланысты қолдау көрсету, ынталандыру, тілдерге сүйіспеншілік пен қызығушылықты, достық пен өзара түсінушілікті насихаттауға бағытталды.
Іс-шараға Қытай, Корея, Жапония және басқа да елдерден келген шетелдік студенттер қатысты.
Шетелдіктердің тілдік және жалпы білім беру дайындығы кафедрасының аға оқытушысы А.Қазмағамбетова сөз алып, Қазақстан халқы тілдерінің күні ерекше мереке екеніне, себебі 5 қыркүйек – қазақ тіл білімі мен әдебиеттану ғылымдарының негізін салушы, ағартушы Ахмет Байтұрсынұлының туған күні екеніне тоқталды. Сонымен қатар Қазақстанда түрлі ұлттар мен ұлыстар өмір сүретінін, олардың әрқайсысының ана тілі бар екенін, тіл арқылы адамдар бір-бірін танып-біле алатынын және кез келген халықтың рухани мәдениеті, дәстүрі, салтымен танысу үшін де тілге жүгінетінін тағы бір еске салды.
Тіл мерекесіне арналған танымдық іс-шара мәдени диалог түрінде шетелдік студенттердің белсенді қатысуымен ұйымдасқан түрде өтті. Мұндай рухани кеш Қазақстан Республикасында өмір сүретін ұлттар достығының дамуына өз үлесін қосты деуге болады.
Айгүл САДЕНОВА,
Шетелдіктердің тілдік
және жалпы білім беру дайындығы кафедрасының оқытушысы
Басқа жаңалықтар
