«Туваның жаңа зерттеулері» журналымен әріптестік орнады

Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев «Туваның жаңа зерттеулері» журналының бас редакторы Ламажаа Чимизаны және Патрис Лумумба атындағы Ресей халықтар достығы университетінің профессоры Ұлданай Бахтыкерееваны қабылдады.

Кездесуде ҚазҰУ мен «Туваның жаңа зерттеулері» журналы екіжақты келісімге қол қойды. Жасалған келісім аясында тараптар алдағы уақытта ғылыми мақалаларды жазуға жәрдемдесіп, қажетті ақпараттарды алмасып жұмыс істейді.

Ректор құрметті қонақтарға ілтипат білдіре отырып, арнайы Әл-Фараби атындағы ҚазҰУ-ға жұмыс сапарымен келгені үшін алғысын білдірді.

Өз кезегінде Ламажаа Чимиза «Туваның жаңа зерттеулері» ғылыми журналының тұжырымдамасын және жұмыс жоспарын жан-жақты таныстырды. Сонымен қатар басылымның Туваның ғылыми қауымдастығын дамытудағы және халықаралық зерттеулерді ілгерілетудегі маңызды рөлі туралы айтты.

«Туваның жаңа зерттеулері» журналы туватану саласындағы кешенді зерттеулердің нәтижелерін жариялайды. Ол Scopus, Web of Science сияқты әртүрлі дәйексөз дерекқорларына енгізілген. Біз тәжірибе және ақпаратпен алмасып,  барлық жағынан бір-бірімізді қолдап, дамуымыз керек. Осы тұрғыда ортақ жобамыздың басталғанына қуаныштымын», – деді бас редактор.

Сондай-ақ кездесуде Ұлданай Бахтыкереева университеттегі филолог мамандармен және түрколог ғалымдармен бірлесіп жұмыс істеуге әрқашан дайын екенін жеткізді.

Айта кетейік, ҚазҰУ-ға жұмыс сапары барысында Ламажаа Чимиза мен Ұлданай Бахтыкереева университет оқытушылары және студенттермен кездесіп,  көшбасшылық дәріс оқыған болатын.

Әл-Фараби атындағы ҚазҰУ-дың Баспасөз қызметі