Әл-Қасимия университетімен әріптестік орнады

Әл-Фараби атындағы Қазақ ұлттық университетіне Біріккен Араб Әмірліктеріндегі Әл-Қасимия университетінің ректоры Ауад әл-Халаф бастаған делегация арнайы жұмыс сапарымен келді.       

Құрметті қонақтармен Басқарма Төрағасының орынбасары – бірінші проректор Еркін Дүйсенов кездесті. 

Тараптар екіжақты қарым-қатынастардың болашақтағы бағыттарына айрықша мән берді.

Жүздесуде проректор Еркін Дүйсенов құрметті мейманға университеттің жетістіктері туралы айтып, ҚазҰУ-дың БАӘ жоғары оқу орындарымен жоғары білім мен ғылым саласында бірлесіп атқарып жатқан жұмыстарына тоқталды.

Бүгінгі таңда Әл-Фараби атындағы Қазақ ұлттық университеті БАӘ-ның алты жоғары оқу орнымен ынтымақтасады. Қол қойылған келісімдер шеңберінде белсенді академиялық алмасу, ғылыми-зерттеу жұмыстары жүргізілуде. 2023/24 оқу жылында екі оқытушы, бір докторант және алты магистрант тағылымдамадан өту және ғылыми-зерттеу жұмыстарын орындау мақсатында Біріккен Араб Әмірліктеріндегі жоғары оқу орындарына жіберілді.

«ҚазҰУ БАӘ университеттерімен әріптестік байланысты дамытуды көздейді. Соның ішінде Әл-Қасимия университетімен өзара тиімді ынтымақтастықты арттыруға мүдделіміз», – деп атап өтті проректор.

Өз кезегінде Ауад әл-Халаф ілтипат білдіргені үшін ҚазҰУ басшылығына ризашылығын айтып, БАӘ Шаржа әмірлігінің билеушісі Шейх Сұлтан әл-Қасими атындағы Әл-Қасимия университеті туралы ақпарат берді. Сонымен қатар өз сөзінде құрметті қонақ қос ЖОО арасындағы серіктестікті одан әрі  дамытуға ниетті екенін жеткізді.

Кездесу соңында ҚазҰУ мен Әл-Қасимия университеті өзара түсіністік туралы меморандумға қол қойды.  

Жүздесуден соң Әл-Қасимия университетінің ректоры Ауад әл-Халаф бастаған делегация шығыстану факультетіне барды. Қонақтарға факультеттегі «Араб тілі мен мәдениеті» залы көрсетілді. Мұнда араб мәдениетін, тарихын зерттеу, дәріс оқу, араб тіліндегі еңбектерді аудару, өңдеу жұмыстары жүргізіледі. Сондай-ақ араб тілін заманауи тәсілдермен үйрету бойынша арнайы дәрістер өткізіледі.

Сондай-ақ арабтану бөлімінің жұмыс нәтижелері баяндалды. Кейін делегация мүшелері факультеттің оқытушы-профессорлар құрамы және білім алушы жастарымен кездесіп, әңгімелесті.

Әл-Фараби атындағы ҚазҰУ-дың Баспасөз қызметі