Цифрландыру жағдайындағы аудит мәселелері талданды

Әл-Фараби атындағы ҚазҰУ Экономика және бизнес жоғары мектебі Халықаралық есепшілер күніне орай, «Цифрландыру жағдайындағы аудит: жаңа құралдар мен үрдістер» тақырыбында дөңгелек үстел өткізді.

Дөңгелек үстел жұмысына саланың танымал сарапшылары, Экономика және бизнес  жоғары мектебі әкімшілігінің (ЭБЖМ) өкілдері, факультеттің профессорлары мен оқытушылары қатысты.

Шараның модераторы – экономика ғылымының кандидаты, Қаржы және есеп кафедрасының доценті Бақыт Сұлтанова қатысушыларды 10 қарашада атап өтілетін Халықаралық есепшілер күнімен құттықтады. Сонымен қатар бұл күнді ЮНЕСКО ұсынысы бойынша Біріккен Ұлттар Ұйымының енгізгенін атап өтті. Аудит Ұлыбританияда нормативтік-құқықтық база құрылған кезде және тәуелсіздік қағидаты аудиттің негізгі қағидаттарының бірі ретінде толық бекітілген кезде бекітілді. Қазақстанда 6 қазанда Бухгалтер күні, ал 18 қазанда Аудитор күні атап өтіледі.

Қаржы және есеп кафедрасы меңгерушісінің м.а., экономика ғылымының кандидаты, қауымдастырылған профессор Ғалымжан Керімбек экономиканың жаһандануы жағдайында бухгалтерлер мен аудиторлар еңбегінің маңыздылығын атап өтті: «Бухгалтердің еңбегі бір кәсіпорын шеңберінде ғана емес, бүкіл ел бойынша бағаланады. Заңнаманы бұзбайтын нақты есептеулер мемлекет экономикасын теңгерімді басқаруға көмектеседі. Аудит ұлттық мүдделерді қорғауды және мемлекеттің қауіпсіздігін қамтамасыз ете отырып, күрделі әлеуметтік-экономикалық процестерді реттеуге мүмкіндік береді».

Дөңгелек үстел отырысында ҚР Аудиторлар палатасының атқарушы директоры Темірлан Сәбитов, Экономика және қаржы департаментінің директоры Әсем Мақашова, экономика ғылымының докторы, Қаржы және есеп кафедрасының доценті Сария Баймұханова, ВТБ банк Ақпараттық технологиялар департаментінің бизнес-талдаушысы Меруерт Әбдірешова және басқалар баяндама жасады.

Шараға қатысушылар цифрландыру жағдайында аудит саласындағы өзекті міндеттерді шешу мақсатында ЭжБЖМ оқытушылары мен жас ғалымдары қоғамдық ұйымдардың өкілдерімен және практик-мамандармен өзара іс-қимыл мәселелерін талқылады.

Әл-Фараби атындағы ҚазҰУ-дың Баспасөз қызметі