Д.Серікбаев атындағы Шығыс Қазақстан мемлекеттік техникалық университеті мен Әл-Фараби атындағы Қазақ ұлттық университетін жақындата түскен кезекті шара ретінде білім беру саласында университеттердің ынтымақтастық туралы келісімге қол қойылуын атап өтуге болады.
Д.Серікбаев атындағы ШҚМТУ ректоры Жасұлан Шаймарданов пен Әл-Фараби атындағы ҚазҰУ ректоры Ғалымқайыр Мұтанов салтанатты жағдайда ғылым, білім және жоғары білікті мамандар даярлау саласында екі жоғары оқу орнының ынтымақтастығы туралы келісімге қол қойды. Келісім аясында ИИДМБ-2 бағыттары бойынша магистранттар мен PhD докторанттарды мақсатты түрде әзірлеуді қамтитын бірлескен шығармашылық қызмет, оқытушылардың білімін жоғарылатуды ұйымдастыру, ғылыми-зерттеу жұмыстарын, конференцияларды, семинарларды, зерттеу жобаларын бірлесе жүргізу, сондай-ақ, халықаралық білім беру, ғылыми және инновациялық жобалар мен бағдарламаларға бірлесе қатысу көзделген.
Жасұлан Құдайбергенұлы атап өткендей, ШҚМТУ-да қазірдің өзінде бірқатар жақсы серіктестер бар, алайда жаңа ынтымақтастық әрдайым жаңа перспективаларға жол ашады. Екі ректор да қол қойылған келісімнің жүзеге асатынына, оның орындалуы таяу болашақта мәуелі жеміс беретініне сенім білдірді. Ғалымқайыр Мұтанов 2003-2010 жылдары ШҚМТУ-дың ректоры болғандықтан бұл іске өзінің аса мүдделі екенін айтып, күні бүгінге дейін бұл жоғары оқу орнын ұмытпағанын, оның табыстары мен жетістіктерін, даму болашағын үнемі қадағалап отыратынын жеткізді.
Ғ.Мұтановтың басшылығымен жұмыс істеген ШҚМТУ-дың оқытушылары оған университетті дамытуға зор ықпал еткен іргелі өзгерістері үшін алғыстарын айтты. Д.Серікбаев атындағы ШҚМТУ-дың ғылыми кеңесінің шешімімен университетті дамытуға қосқан баға жетпес үлесі үшін Ғалымқайыр Мұтановқа «Д.Серікбаев атындағы ШҚМТУ-дың Құрметті профессоры» атағы берілді.
Кездесу соңында Ғалымқайыр Мұтанов өзінің бұрынғы әріптестері Ж.Нәзбиевке, Н.Линокқа, Ю.Баталовқа, Н.Хисамиевке және Д.Серікбаев атындағы ШҚМТУ-дың ректоры Жасұлан Шаймардановқа, сондай-ақ, ҚазҰУ журналистика факультетінің әр жылдардағы түлектері «Шығыс-Ақпарат» ЖШС директоры Н.Қуантаевқа, БАҚ ардагерлері Ж.Әділбаевқа, А.Акаваға, О.Елубайға Әл-Фараби атындағы Қазақ ұлттық университетінің мерекелік медальдарын тапсырды.
Д.Серікбаев атындағы ШҚМТУ-дың баспасөз қызметі
Басқа жаңалықтар
