Желаяқ Қосановпен бірге жаттыққан түлек
Өткен ғасырдың 70-жылдарында С.М.Киров атындағы Қазақ мемлекеттік университетінде білім алған, жеңіл атлетикадан бес жыл университеттің, үш жыл қатарынан Алматы қаласының чемпионы болып қара шаңырақтың абыройын асқақтатып, туын желбіреткен Тоқтархан Тезекбаев бір кездерде өзі түлеп ұшқан оқу орнының басшылығын, ғалымдарын, ұстаздарын, студенттерін 90 жылдық мерейтойымен төл газеттері арқылы құттықтау үшін Өскемен қаласынан редакциямызға арнайы келіпті.
– Өзім оқыған оқу орнының қандай да болсын жетістіктерін мақтан тұтамын. Әл-Фараби атындағы Қазақ ұлттық университеті сапалы білім беруде, жоғары білікті мамандар даярлау ісінде қашанда алда, білім беру саласында ғылыми-зерттеулер жүргізуде де әрдайым көш басында келеді. Қазақ ұлттық университетінің барша ұжымын 90 жылдық мерейтойымен шын жүректен құттықтай отырып, университет профессорлары мен оқытушыларына аса жауапты студенттерге сапалы білім, саналы тәрбие беру жолындағы еңбектеріңізге толағай табыс және ғылыми жетістіктер тілеймін! – дейді университетіміздің түлегі, зейнеткер Тоқтархан Тезекбаев.
Тоқтархан аға 1972-79 жылдары тарих факультетінде этнография мамандығы бойынша оқыпты. Бала кезінен спортқа бейім болып, жеңіл атлетикадан ауданда алдына жан салмайтын болған. Сол жылдары оны студенттердің «Буревестник» спорт қоғамында жеңіл атлетикадан үлкен спортқа дайындаған екен. 1975 жылы КСРО универсиадасына, 1976 жылы Орта Азия және Қазақстан чемпионатына қатысып, жүлделі орындарды жеңіп алған. Спорттағы жетістіктері үшін Қазақстан БЛКЖО ОК Құрмет грамотасымен, университет комсомол комитетінің бірнеше грамотасымен, ҚазМУ ректоры Ө.Жолдасбековтің алғыс хатымен марапатталған. Университетте оқыған жылдары «Желаяқ» деген атпен танымал болған.
– Университетімізден мықты спортшылар көп шықты, – деп еске алады Тоқтархан Тезекбаев. – Мен 400, 800, 1500 метрлік қашықтыққа жүгірдім. Бізді Қазақстанның жеңіл атлетикасына еңбегі сіңген тренер Геннадий Дорофеевич Иванов жаттықтырды. Университеттік командада Владимир Волков, Фазыл Қалиев, Владимир Богданчиков, Сергей Тараненко, аты аңызға айналған қазақстандық желаяқ, олимпиаданың күміс жүлдегері Ғұсман Қосановтармен бірге жаттығып, батасын алдым. Ыстықкөлдің жағасында жатып та үлкен жарыстарға дайындалатынбыз. ҚазМУ атынан КСРО бойынша студенттер арасындағы жарыстарға жиі шығатынбыз. Университет командасы құрамында Ташкент, Тбилиси, Донецк, Винница қалаларында өткен студенттер арасындағы ойындарға қатыстым. Сол кездерде «КСРО спорт шеберлігіне кандидат» деген спорттық дәрежеге жеттім. Қазір жасым жетпіске келсе де қалалық жарыстарға қатысып, жүлделі орындарға қол жеткізіп жүрмін. Бұл да студенттік өмірден алған тәжірибелерімнің бірі деп ойлаймын. Студенттерге айтарым, спорт деген – үлкен әлем, денсаулықтың кепілі, сондықтан оған үнемі уақыт бөліп, жас кездеріңде ынта қою керек.
Қайыржан
ТӨРЕЖАН
Басқа жаңалықтар
