Далянь университетімен байланыс

Қытайдың Далянь университетінің делегациясы ҚазҰУ-ға жұмыс сапарымен келді. Кездесу барысында тараптар ғылым мен білім саласындағы ынтымақтастық мәселелерін, студенттер мен оқытушылар алмасу мүмкіндіктерін талқылады.

ҚазҰУ Басқарма Төрағасының орынбасары – бірінші проректор м.а. Еркін Дүйсенов қонақтарды ҚазҰУ-дың жетістіктерімен, алдағы жоспарларымен таныстырып, университеттің Қытаймен білім және ғылым саласы бойынша тығыз қарым-қатынаста екенін атап өтті.

Бүгінде ҚазҰУ ҚХР-дың 65 жоғары оқу орны және ұйымдарымен ынтымақтасуда. Олармен жасалған келісімдер аясында академиялық және ғылыми зерттеулер белсенді түрде жүзеге асырылуда. Жыл сайын ҚХР университеттеріне оқытушылар, докторанттар, магистранттар және бакалавриат студенттері оқуға және тағылымдамадан өтуге жіберіледі. Бүгінгі таңда «Биологиялық инженерия» және «Биотехнология» мамандықтарының 14 түлегі Шэньжэнь университетінің медицина мектебінде білім алып, ғылыми тағылымдамадан өтуде. ҚазҰУ-да Қытайдан келген 869 студент оқиды. Еркін Дүйсенов 2023 жылы ҚХР Солтүстік-батыс политехникалық университетінің (СБПУ) ҚазҰУ-дағы филиалының ашылуы туралы баяндады. Сондай-ақ ҚазҰУ базасында ҚХР университеттері мен институттары және ұйымдарының қатысуымен орталықтар мен зертханалардың ашылғаны туралы хабардар етті.

Өз кезегінде Далянь ғылым және технологиялар бюросы директорының орынбасары Цзян Синхай мырза жылы қабылдағаны үшін  ҚазҰУ ұжымына ризашылығын білдіріп, бірлескен жобалар мен зерттеулерге қызығушылық танытты. Келіссөз барысында тараптар бірлескен ғылыми жобалар мен оқу курстарын құру бағыттары бойынша пікір алмасты.

Сапар соңында ҚХР Далянь университетінің делегациясы Дәрілік өсімдіктерді ғылыми-зерттеу орталығы және Farabi hub жұмысымен танысты.

 Әл-Фараби атындағы ҚазҰУ-дың Баспасөз қызметі