PhD, қауымдастырылған профессорлар Жидебекқызы А. және Досжан Р. ConnectEurasia жобасы аясында Швейцарияға сапармен барды

2024 жылдың 19-23 тамызы аралығында Әл-Фараби атындағы Қазақ ұлттық университетінің PhD, , қауымдастырылған профессорлары Жидебекқызы А. Мен Досжан Р. Швейцарияның Невшатель қаласындағы Swiss Eurasian Institute of Management (SEIM) институтына Connect Eurasia жобасы аясында сапармен барды.

Connect Eurasia жобасы – Швейцария, Әзірбайжан, Қазақстан және Қытай елдерінің бес жетекші университетінің серіктестігі арқылы жүзеге асырылып жатқан ерекше бастама. Жоба аясында халықаралық студенттерді біріктіріп, олардың мәдени дағдыларын дамытуға және Еуразия нарығын тұрақты даму тұрғысынан тереңірек зерттеуге бағытталған Халықаралық ынтымақтастыққа негізделген онлайн оқу бағдарламасы (COIL) әзірленуде.

Жобаға қатысушылардың алғашқы күні SEIM кампусы  мен Невшатель қаласын аралаудан басталды, бұл әріптестер бірлігін нығайтып, жемісті талқылауларға негіз болды. Негізгі назар уақыт белдеулері, академиялық күнтізбелер және оқу кредиттерін үйлестіру сияқты күрделі логистикалық міндеттерді шешуге бағытталды.

Апта бойы профессорлар COIL бағдарламасының оқу мақсаттарын, мазмұнын және бағалау әдістерін анықтау бойынша қарқынды жұмыс жасады. Төрт түрлі елдің білім беру жүйелерінің айырмашылығына қарамастан, жоба тобы бакалавриат және магистратура деңгейіндегі студенттердің қажеттіліктерін қанағаттандыратын бірыңғай тұжырымдама әзірледі.

Бұл жоба Haute école de gestion Arc және Swiss Eurasian Institute of Management (SEIM) әріптестерінің қолдауы мен қонақжайлылығының арқасында жүзеге асты. Әсіресе, Юлия Вирт, Лукас Башунг, Гюльдем Карамұстафа-Кесе, Джулиана Милман және басқа да қатысушылардың кәсіби тәжірибесі мен белсенділігі бұл ынтымақтастықтың сәтті болуына ықпал етті.

ConnectEurasia жобасы аясында жасалған идеялар мен шешімдер серіктес университеттер үшін ғана емес, бүкіл жоғары білім беру, оқытушылар мен студенттер және бизнес үшін маңызды. Бұл жоба халықаралық ынтымақтастық пен білім беру инновацияларының әлеуетін көрсететін жарқын мысал.