Әл-Фараби атындағы Қазақ ұлттық университеті Қазақстан ғылымы мен білімінің тарихындағы маңызды оқиға – 90 жылдық мерейтойын атап өтті.

Әл-Фараби атындағы Қазақ ұлттық университеті өз тарихындағы маңызды белес – 90 жылдық мерейтойын атап өтті. Салтанатты шарада Қазақстан Республикасы Президентінің құттықтауын Мемлекеттік кеңесші Ерлан Қарин оқып берді.
Президент өз құттықтауында әл-Фараби атындағы ҚазҰУ-дың Қазақстандағы білім мен ғылымның флагманы, Орталық Азия университеттерінің ішінде халықаралық рейтингтердегі көшбасшы екенін атап өтті. Мемлекет басшысы университет түлектерінің еліміздің дамуына қосқан үлесін ерекше атап, ҚазҰУ-дың қазақстандық білім берудің маңызды бренді болып қала беретінін айтты.

Шара барысында Ерлан Қарин Президент атынан университет оқытушылары мен қызметкерлеріне мемлекеттік наградалар табыстады. Сонымен қатар, жас ғалымдарға жаңа пәтер кілттері тапсырылды, бұл мемлекет тарапынан жас ғалымдарға көрсетілген қолдаудың айқын көрінісі болды.
Халықаралық қатынастар және әлемдік экономика кафедрасының профессоры, Мовкебаева Ғалия Ахметвалиевна, ғылым мен білімді дамытудағы еңбегі үшін Президент атынан мемлекеттік «Құрмет» орденімен марапатталды. Бұл жоғары марапат профессордың көпжылдық еңбегінің маңыздылығын көрсетеді.
Мерейтой аясында университеттің жетістіктері туралы деректі фильм көрсетіліп, қызметкерлер, студенттер мен түлектер марапатталды. Салтанатты шара шығармашылық ұжымдардың және отандық опера мен эстрада жұлдыздарының концертімен аяқталды.

Халықаралық қатынастар факультеті әл-Фараби атындағы ҚазҰУ-дың бір бөлшегі болуды мақтан тұтады. Университетіміздің тарихы терең, болашағы жарқын!