Ректор ардагерлерді құттықтады

Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев Жаңа жыл  қарсаңында ЖОО Ақсақалдар кеңесінің мүшелерін мерекемен құттықтап, оларға арнайы сыйлықтар жолдады.

Бұл университеттегі мерекелік дәстүрлердің бірі. Жаңа жыл қарсаңында университет басшысы еңбек сіңірген оқытушылар, профессорлар мен ғалымдардың еңбегін атап өтеді. Ректор өзінің құттықтауында Ақсақалдар кеңесі университет өмірінде маңызды рөл атқаратынын және олардың білімі мен тәжірибесі бүгінгі жастарға үлгі екенін атап өтті. Жансейіт Қансейітұлы сондай-ақ университеттегі аға буынға деген құрметке негізделген дәстүрлерді дамытуды жалғастыратынын және білім беру мен ғылыми қызметте жаңа жетістіктерге ұмтылатынын айтты. ҚазҰУ ректоры университеттегі ұрпақтар байланысы ешқашан үзілмейтініне, жас ғалымдар ақсақалдардың тәжірибесі мен білімін жалғастыратынына, ал олар өз кезегінде ЖОО оқытушылары мен ғалымдарының жас буынын қолдайтынына сенім білдірді.

Кеңес мүшелері биыл атқарылған жұмыстарды жоғары бағалап, университет басшылығына алғысын білдірді. Олар жетістіктер арасында университетте география және табиғатты пайдалану, химия және химиялық технология факультеттерінде 19 зертхананың ашылуын, «Фараби хаб» сияқты жаңа ғылыми және инновациялық орталықтардың құрылуын, ҚазҰУ кампусының II кезеңі құрылысының басталғанын атап өтті. Жаңа жыл қарсаңында Ақсақалдар кеңесі ЖОО ұжымына табыс пен жемісті жұмыс тіледі.

Әл-Фараби атындағы ҚазҰУ-дың Баспасөз қызметі