Мемлекет басшысы Қасым-Жомарт Тоқаев «Ana tili» газетіне берген сұхбатында 2024 жылға қорытынды жасап, ел экономикасы, халықтың әлеуметтік жағдайы, елдегі заң саласына қатысты өзгерістерге жан-жақты тоқталып, маңызды мәселелерді шешуге қатысты жоспарларымен бөлісе отырып, 2025 жылда жоспарланған жаңа бастамалар мен өзгерістерді айтып өтті.
«Еліміздің тағдыры – жастардың қолында. Біз мәдениеті жоғары, отаншылдығын істерімен көрсете алатын ұрпақ өсіруге міндеттіміз. Қазақстанда талантты, білімді, көздеген мақсаттарына жете алатын жігерлі жастар өте көп. Сондықтан мен жастарға сенемін деп жалықпай айта беремін», – деп жастарға үміт артатынын жеткізді. Мемлекет басшысы жастарымыздың ілім, білім қуып немесе қызмет жасау мақсатында шетелге шығуға қатысты пікірін білдіре отырып, халықаралық «Болашақ» стипендиясы арқылы жас ғалымдардың шетелдегі ғылыми орталықтарда тағылымдамадан өтуіне жағдай жасалғанын және ары қарай да жасала беретінін ерекше атап өтті. Жастар кәсіби біліктіліктерін шетелдерде арттырып, білмегендерін үйренгеннен қорықпауы керек, өзгерістерге бейім, ширақ болулары тиіс.
«Еліміздің азаматтары шетелдерде жүрсе де, өз елінің салт-дәстүрі мен әдет-ғұрыптарын дәріптеп, еліміздің абыройын асқақтатуға атсалысып, Отанына пайдасын тигізе алады» деген Президент пікірін қолдаймын. Мәселен, мен қазіргі таңда «Болашақ» бағдарламасы аясында Лондонның империал колледжінде химиялық инженерия, соның ішінде нанотехнология бағытында ғылыми жұмыстар атқарып жүргеніме бес ай болды. Өз басым әлемнің ең жоғарғы топ университеттерінен тағылымдамадан өту әр қазақ үшін абырой деп есептеймін. Лондонның империал колледжіндегі бес ай уақытта ғылыми зерттеу жұмысымнан бөлек, материалдарды зерттеудің физико-химиялық әдістерінің біршамасын игердім. Бұл менің алдағы уақытта өз университетім – Әл-Фараби атындағы ҚазҰУ-да дәріс оқығанда да, тәжірибелік сабақтарды жүргізгенде де материалдарды жеңіл түрде жеткізуіме септігін тигізетініне кәміл сенемін.
Сонымен қатар материалдарды зерттемес бұрын, үлгіні қалай дайындау керек және т.с.с көптеген пайдалы ғылыми тәжірибелер алудамын. Президентіміз «Мемлекетіміздің тәуелсіздігін баянды ету – басты мақсат» деп айтқандай, өскелең ұрпақ, яғни мына біз жан-жақты дамып, мәдениеті жоғары мықты ел болып, тәуелсіздігімізді сақтап қалуға өз өмірлерін құрбан еткен аға ұрпақтардың жолын жалғап, жүрегіміз «Отан» деп соғып, тәуелсіздігіміз үшін, келешек ұрпақ үшін білімді болуымыз керек.
Меруерт НАЖИПҚЫЗЫ,
Әл-Фараби атындағы ҚазҰУ профессоры, Лондонның империал колледжінің ғылыми зерттеушісі
Басқа жаңалықтар
