Әл-Фараби атындағы ҚазҰУ-дың Қиыр Шығыс кафедрасы студенттерінің «Шинхан Банк Қазақстан» АҚ-дағы өндірістік тәжірибесі

Әл-Фараби атындағы ҚазҰУ-дың Қиыр Шығыс кафедрасының ең сенімді және тұрақты серіктестерінің бірі – «Шинхан Банк Қазақстан» АҚ. Банк жыл сайын әлеуметтік тұрғыдан аз қамтылған санаттағы жеті үздік студентке шәкіртақы тағайындап, олардың білім алуына қолдау көрсетеді.

Сонымен қатар, он жылдан астам уақыт бойы банк түлектерді өндірістік тәжірибеден өткізіп, үздік студенттерді жұмысқа орналастыруда. Бүгінгі таңда «Шинхан Банк Қазақстан» АҚ-да ҚазҰУ-дың  корейтану бөлімінің 12 түлегі еңбек етуде.

2024–2025 оқу жылының өндірістік тәжірибесі аясында Қиыр Шығыс кафедрасы банкке бес студентті тәжірибеден өтуге жіберді, олардың екеуі оқуын аяқтаған соң тұрақты жұмысқа орналасу мүмкіндігіне ие болады. Тәжірибе барысында студенттер банк қызметінің негіздерімен танысып, қаржы секторының ерекшеліктерін зерттеп, университетте алған білімдерін тәжірибеде қолданады. Олар қаржылық операцияларды талдауға қатысып, клиенттермен жұмыс жүргізіп, халықаралық қаржы ұйымындағы жұмыс дағдыларын меңгереді.

«Шинхан Банк Қазақстан» АҚ-да тәжірибеден өту – студенттер үшін бағалы кәсіби тәжірибе жинақтап, еңбек нарығында бәсекеге қабілетті болуға үлкен мүмкіндік. Банк базасында тәжірибеден өткен көптеген түлектер бүгінде қаржы, халықаралық бизнес және экономикалық талдау салаларында табысты мансаптарын жалғастыруда.

Қиыр Шығыс кафедрасы «Шинхан Банк Қазақстан» АҚ-ға студенттерді қолдап, олардың кәсіби дамуына қосқан елеулі үлесі мен көпжылдық серіктестігі үшін шынайы алғыс білдіреді. Біз болашақта да өзара тиімді ынтымақтастықтың жалғасатынына және студенттерге халықаралық қаржы институттарында тәжірибеден өту мүмкіндіктерінің кеңейетініне сенімдіміз.