Айқын

Ел тынысын тани білетін көшбасшы

Әл-Фараби атындағы Қазақ ұлттық университеті ЖОО дейінгі білім беру факультетінің ЖОО дейінгі дайындық кафедрасында Елбасының «Қазақстан жаңа жаһандық нақты ахуалда: өсу, реформалар, даму» атты Қазақстан халқына арналған кезекті жолдауы кеңінен талқыланды.
Кафедра меңгерушісі, профессор Наухан Алтайұлы талдаудың негізгі мақ­саты мен міндетін ашып айтып, «Ел­ба­сының әрбір жолдауы ел қамы үшін жа­са­латынын бірінші кезекте түсінуіміз қажет. Бұл жолдаудың ерекшелігі сонда, әлемдік бо­лып жатқан дағдарыстан шығудың ұтым­ды даму жолдарын саралап, нақтылы ат­қа­рылатын іс-әрекеттердің бағыттары жай­лы айтылып, сол бойынша жұмыс жүргізуіміз ке­рек­тігін айқындап, елімізді алға жете­лей­тін жаңа экономикалық саясатқа көшетін жаңа жоспарлар белгіленді» деп өз ойын ортаға салды.
Елбасы өзінің жолдауын Тәуел­сіз­ді­гі­міздің 25 жылдығын ескере отырып бас­та­ды. Тәуелсіздік алғаннан бері мемлекетіміз та­лай тығырықтардан шығып келеді. Не­бәрі ширек ғасырда Қазақстан жаһандық шаруа­шылық байланыстарға қосылған еге­мен ұлттық экономика және ұлттардың әлем­дік отбасының толыққанды қатысу­шы­сына айналған мемлекет ретінде қалып­тасқанын ерекше ынтамен атап өтті. Шы­ны­мен де, еліміздің тарихында қазіргі уа­қыт есте қаларлық заман болады. Өйт­кені Қазақстанның бүгінгі экономикалық жағдайы елімізді әлемдегі 30 дамыған елдің қатарына кіргізетін жағдайға әкеле жатыр. ҚР Президенті Н.Назарбаевтың жүргізіп отырған салиқалы саясатының арқасында бұл дағдарысты да бір жеңнен қол, бір жа­ғадан бас шығара отырып, мемлекеттің дамуы­на әрбір азамат үлес қосып, отандық ішкі өнімді өндіру арқылы қолдау көрсетсе, мемлекеттің құлдырауына жол берілмей, дағдарыстан сүрінбей өтеріне жасалған мықты қадам болмақ. Осыған байланысты жарияланған жолдаудың бағыттары біздің кәсіпкерлерге табыс кілтін ашатын жаңа серпіліс берді. Жолдауда айтылған өсу, реформа, даму жоспарлары болашақта еліміздің дамыған отыз елдің қатарына енуіне септігін тигізетін кәміл бастама еке­ніне се­ні­міміз мол. Сонымен бірге Қазақ­стан­да жа­салынып жатқан барлық жағ­дайлар мен мүм­кіншіліктер елдің болашақ жастары үшін екенін де айтып өтуге бо­лады. Оны Ел­басымыздың мына сөздері растайды: «Бі­лімді, еңбекқор, бастамашыл, белсенді болуға қазірден бастап дағды­ланыңдар. Жұ­мыс пен сұраныс бар өңірге батыл ба­рыңдар. Шеберліктің шыңына жете біл­сеңдер, мамандықтың бәрі жақсы. Қазір техникалық мамандықтардың, ғы­лым мен инновацияның күні туған заман. Ерінбей еңбек еткен, талмай ғылым із­де­ген, жалық­пай техника меңгерген адам оза­ды. Тұр­мы­сы жақсы, абыройы асқақ бо­лады. Біз жү­зеге асырып жатқан түбе­гейлі рефор­малар мен атқарып жатқан қыруар істердің бәрі сендер үшін, болашақ үшін жасалуда». Елбасымыз жалынды сөз­дерімен жастарға бір серпін беріп, өзінің сенімін білімді жастарға артты. Демек, елі­міздің абыройы мен даңқын асқақтатар, елі үшін аянбай еңбек ететін ол – жастар екені сөзсіз. Мем­ле­кеттің болашағы жастар болғандықтан, жыл сайын білім саласына да қыруар қар­жы бөлініп, қазіргі уа­қытта Қазақ­станда білімді жастардың саны артып келеді. Осыған орай, жаһандық дағ­дарыс­тың қиын­шылығына қарамастан тәуекелге ба­рып, елдің болашағын дамыту мақса­тында кәсіби-техникалық білім беру­дің тегін бо­­латындығы жайлы айтылып және көп­теген жұмыс орындары ашылып, бі­лімді жас­тар­ды жұмыспен қамту, со­нымен бірге жыл сайын­­­ғы қаржы тұрақ­сыздығына бай­ла­нысты жәрдемақылары мен жала­қыларын көтеріп отыру, баспа­намен қам­та­масыз ету жақтары да жақсы жолға қойы­лып отыр. Әрине, жолдауда алға қой­ған мақсаттар мен мін­деттерді орындау оңай болмайды. Бірақ жас­­­тардың Қазақ­станда алып жатқан са­палы білімдерінің арқасында сенім арт­қан елбасымыздың үмітін ақтайтынына кә­міл сенеміз.
Елбасының әр Жолдауы стилі бір-бі­ріне ұқсамайтын халықты өрге шығаратын сара жол екеніне көзіміз жетіп келеді. Елі­мізге еңсе тіктетіп, мемлекетімізді мы­ғым­дап берген, халқымызды әлемге танытып, алаш баласының абыройын асқақтатып отырған Елін сүйген, елі сүйген Елбасының кі­сілік келбетін, сан қырлы талант иесі, ал­ғыр тұлға екенін танытып ұрпақтан-ұр­паққа үлгі ретінде насихаттап, мақтанышпен жет­кізу – аға буынның басты міндеті деп бі­леміз.
Өрікгүл САНДЫҚБАЕВА, әл-Фараби атындағы ҚазҰУ-дің, ЖОО-ға дейінгі білім беру факультетінің доценті, философия ғылымдарының кандидаты
http://aikyn.kz/ru/news/show/18671-el_tynysyn_tani_b_lgen_k_shbasshy