Досжанның философиялық фотоальбомы

Университеттің 90 жылдық мерейтойына орай, ҚазҰУ-дың Баспасөз қызметі «Farabi universiteti – 90» кітап-фотоальбомын әзірлеп, жарыққа шығарды. Фотоальбомдағы фотосуреттердің авторы – ҚазҰУ түлегі, Философия кафедрасының аға оқытушысы, PhD Досжан Балабекұлы. 

Философия докторы Досжан Балабекұлы фото­өнерімен ондаған жылдар бойы қолы бос уақыттарда айналысады. Фотография – философтың хоббиі.  Ол Қазақстан жур­налистер одағының, «Фото­өнер» қо­ғамдық бір­лес­тігінің, Қазақ­стан ав­торлар қоғамы­ның мүшесі. Бір­қатар республи­калық және халықаралық медиа байқаулардың жүл­де­гері. Бұдан бұрын Досжан Балабекұлының журна­листика факультетінде оқы­тушысы Асылхан Әбдіра­йым­ұлымен бірлескен «Фо­то­графия өнері: таңда­малы мақала­лар жинағы» және «Фото­журналист анық­тамалығы» анықта­ма­лық сөздігі жарық көрген болатын. «Qazaq universiteti» газетінде бас редактор болып ұзақ жыл еңбек еткен Досжан Балабекұлы ҚазҰУ қала­шығына қатысты ғажа­йып фототуынды­лардың авто­ры. Оның университет қала­шығында түсірілген фо­то­суреттері бүгінде ме­диа кеңістікте кең тарал­ған. Тіпті ҚазҰУ-дың шетел­дердегі филиалдарында ілінген Досжан Балабек­ұлы­ның авторлық фотосу­рет­терін көруге болады.

Досжан оқытушылықтан тыс уақытында ҚазҰУ қала­шығының басқалар байқай бермейтін керемет құбы­лыстарын объективпен ұс­тап алып, фотографияның керемет тілімен жариялап отырады. Көпшілік сүйсіне тамашалап, әдемі көрініс­терден ләззат алатын фото­суреттердің арғы жа­ғында қаншама еңбек, қаншама ізденіс жатыр?! Оны түсіну керек. Көркем фотосуретті түсіру, оның ракурсын табу оңай жұмыс емес, көп адамның қолынан келмейтін өнер деуге бо­лады. Жұрт кешке жұмыс­тан қайтқанда ол үшін фото­графияның алтын уақыты басталады. Фото­сурет деген – фотообъек­тивте қатып қалатын қас-қағым сәт. Сол сәтті жіберіп алмайын деп, қас қарай­ғанға дейін ұтымды фото­кадрларды іздейтін кезі болады. Таңғы елең-алаңда да солай. Кейде жұрт жұ­мысқа жиналып, үйінен шы­ғатын кезде Досжан қала­шықтағы фотожұмыстарын енді аяқтап жатады. Көп адамдар фото өнерін түсіне бермейді, сіз бен біз тама­шалап қарайтын фотосу­реттің қаншалықты уақыт пен кеңістікке байланғанын және оны сезінетін қандай түйсік, шынайы сүйіспен­шіліктің керек екенін білу керек.

Қалың оқырманға ұсы­нып отырған «Farabi universiteti – 90» фотоаль­бо­мына Досжан Балабек­ұлының соңғы жылдардағы еңбегі жинақталып берілді. Мұн­дағы фотосуреттерде ҚазҰУ қалашығының жыл­дың төрт мезгіліндегі әр­түрлі көрінісі бейне­ле­неді. Кампустағы оқу корпус­тары, спорт кешен­дері, тұрғын-жай ғимараттары әртүрлі ракурста табиғат құбылыстарымен астасып, ерекше көркем тәсілмен беріледі. Кітапты парақтап отырсаңыз, көп тылсым дүниені парықтайсыз. Бір суретте Алатаудың ақбас шыңы қою қараңғы түнмен ұштасып, студенттер қала­шығының төбесінен шан­шы­лып қарап тұрса, екінші­сінде аппақ қарға малынып маужыраған қалың ор­манды көресіз. Кампус ау­мағында Досжанның ныса­насына түз тағысы түлкі, орман тұрғыны тиіндер де ілініп тұрады. Көк аспан­дағы жөңкіліп жатқан ақбауыр бұлттарды да, тіпті жасынның жарқылын да Досжан бір мезетке сый­дырып, уақытты тоқтатып, алдарыңызға жайып са­лады. 

Бұл кітап-фотоальбом Досжан Балабекұлының өзі оқыған, бүгінде ұстаздық етіп жүрген қара шаңы­раққа тартуы. Университет ректоры  Жансейіт Түймебаев ғылым және жоғары білім саласына сіңірген ерен еңбегі және Қазақ ұлттық универси­тетінің өркендеуі мен дамуына қосқан зор үлесі үшін философия және саясаттану факультетінің аға оқытушысы, PhD Досжан Балабекұлын «Әл-Фараби» алтын медалімен марапаттады. Бұл универ­ситетке шын сүйіспенші­лікпен еңбек етіп жүрген жас ғалымға үлкен қоше­мет, қолдау деп білеміз.

Қайыржан ТӨРЕЖАН