Академиялық ықпалдастықты дамыту
ҚазҰУ-да Шыңжаң ғылым докторлары одағы (Xinjiang Doctors Association) мен Farabi International Business School өкілдері арасында кездесу өтті. Тараптар жас кәсіпкерлерді қолдау құралы ретінде бизнес-инкубаторларды дамыту, сондай-ақ ҚазҰУ докторларының қауымдастыққа қосылу шарттары бойынша пікір алмасты.
Бизнес-инкубаторлар бүгінде студенттер мен жас ғалымдарға ғылыми идеяларды табысты коммерциялық жобаларға айналдыруға мүмкіндік беретін білім беру экожүйесінің маңызды бөлігіне айналуда. Кездесуде қатысушылар стартаптар үшін университет инфрақұрылымын нығайту жолдарын, соның ішінде акселерациялық бағдарламаларды құруды, прототиптеу сатысында қолдауды және инвесторларды іздеуді талқылады. Сонымен қатар университеттер арасындағы ынтымақтастықты кеңейту арқылы ғылыми зерттеулерді коммерцияландырудың жаңа әдістерін енгізу қажеттілігі атап өтілді.
Талқылаудың тағы бір маңызды тақырыбы – ҚазҰУ ғылым докторларының Xinjiang Doctors Association-ға кіру шарттары болды. Қазақстандық зерттеушілерді неғұрлым кең ғылыми қоғамдастыққа біріктіру мәселесі қызу пікірталас тудырды. Қатысушылар академиялық алмасудың, бірлескен зерттеулер жүргізудің, сондай-ақ халықаралық ғылыми журналдардағы жарияланымдар санын арттырудың маңыздылығын атап өтті.
Университеттер арасындағы ықпалдастықты нығайту озық әдістемелермен алмасуға және ғылыми зерттеулердің сапасын жақсартуға серпін береді. Кездесу соңында тараптар ынтымақтастықты дамыту, бірлескен жобалардың жол картасын әзірлеу мәселелерін талқылады.
Әл-Фараби атындағы ҚазҰУ-дың Баспасөз қызметі
