Форум қатысушыларына физика саласындағы инновациялық жобалар таныстырылды

Әл-Фараби атындағы Қазақ ұлттық университетінде өткен «Ғылым, бизнес және өндіріс ықпалдастығы» атты форумға қатысушылар назарына физика-техникалық факультетінің ғалымдары әзірлеген инновациялық жобалары туралы ақпарат берілді.

Қазіргі таңда факультет зерттеушілері ашық үлгідегі ұлттық нанотехнологиялық зертханасында электроника, медицина және энергетика үшін озық наноқұрылымды материалдарды әзірлеуде.

Атап айтқанда электрондық литография технологиясын қолдана отырып, наноөлшемді фотодетекторлар мен голографиялық қаптамалар жасалды. Бұл  өз кезегінде қымбат өнімдерді  контрафактілерден қорғауға мүмкіндік береді.

Факультет мамандары жасанды интеллектуалды электронды түсті терапия көзілдіріктерін, сондай-ақ төмен температураны тұрақты ұстап тұруды қамтамасыз ететін биологиялық белсенді заттарды тасымалдауға арналған мобильді қораптарды коммерцияландыруда.

Сонымен қатар ғалымдар республикада бірінші болып көміртекті наноматериалдар саласында ауқымды нәтижелерге қол жеткізді.  Яғни физика-техникалық факультетінің зерттеушілері төмендетілген графен оксидінің гибридті электродтары негізінде суперконденсаторлардың прототиптерін әзірледі.

Бұған қоса, келушілер назарына денсаулықты нығайтуға жәрдемдесетін көміртекті наноқоспалары бар инновациялық тамақ өнімдері, өсімдік майлары көрсетілді.

Аталған барлық инновациялық өнімдер Қазақстан Республикасының патенттерімен қорғалған.

Әл-Фараби атындағы ҚазҰУ-дың Баспасөз қызметі