ҚазҰУ-дағы ZTE орталығы жаңа технологияларды әзірлеуге жол ашады

Әл-Фараби атындағы Қазақ ұлттық университетінде өткен «Ғылым, бизнес және өндіріс ықпалдастығы» атты форумда келушілер назарына ZTE компаниясымен бірлесіп ашылған инновациялық орталықтың жұмыс нәтижелері  таныстырылды.

Орталық  менеджмент және сараптама бағыттары бойынша оқыту мен сертификаттауды, сондай-ақ радио қол жеткізу желілерінде шешім қабылдау негіздерін ұсынады.

Бірлескен зертхана ультра жылдамдықты платформалар, көпжиілікті жүйелер, жасанды интеллект технологиялары, ультра кеңжолақты антенналар және басқа да озық әзірлемелермен қамтылған. Бұл құрал-жабдық жоғары өнімділікті, төмен кідірісті және деректерді берудің сенімділігін қамтамасыз ететін 4G және 5G желілерін құру үшін қолданылады.

Сонымен қатар орталық оқытушылар мен студенттердің тағылымдамадан өтуіне,  жаңа технологияларды іске асыруға жол ашады. Оқуын аяқтағаннан кейін түлектерге халықаралық стандарттарға сәйкес келетін сертификат табысталады.

ZTE 5G технологияларын әзірлеу және коммерциялау бойынша әлемдегі көшбасшы болып табылады.  Компания өнімдері мен қызметтері әлемнің 160-тан астам елінде ұсынылған. ZTE телекоммуникациялық жабдықты ұсынып қана қоймайды, сондай-ақ тұтынушылық электроника, соның ішінде смартфондар саласында бәсекеге қабілетті. ZTE телефондарының бірнеше модельдері жаһандық нарықта жоғары сұранысқа ие.

Әл-Фараби атындағы ҚазҰУ-дың Баспасөз қызметі