CASE-IN «Мұнайхимия» бағыты бойынша Қазақстандағы жартылай финал: Мәскеудегі үлкен финалға жолдама үшін 12 үздік команда бақ сынады

Аль-Фараби атындағы ҚазҰУ-дың Химия және химиялық технология факультетінде, Физикалық химия, катализ және мұнай-химия кафедрасының базасында CASE-IN халықаралық инженерлік чемпионатының «Мұнайхимия» бағыты бойынша жартылай финалы өтті. Бұл беделді жарыс Қазақстанның әртүрлі жоғары оқу орындарынан 12 үздік студенттік команданы жинады. Ресей мен ТМД елдерінің студенттерін біріктіретін чемпионат жас мамандарға өз білімін көрсетуге, оны нақты өндірістік кейстерге қолдануға және инженерлік жобалау бойынша тәжірибе алуға бірегей мүмкіндік береді.

Биылғы кейс СИБУР компаниясының қатысуымен әзірленіп, қайта алынатын изобутиленді бөлу процесінің тиімділігін арттыруға арналды. Изобутилен – синтетикалық материалдар өндірісінде кеңінен қолданылатын маңызды шикізат. Қатысушылардан қолданыстағы технологиялық үдерісті талдап, оны оңтайландыру бойынша бірнеше нұсқа әзірлеу, инжинирингтік бағдарламалық қамтамасыз ету арқылы модельдеу және таңдаған шешімнің техникалық-экономикалық негіздемесін қорғау талап етілді. Жобаларды бағалау Қазақстан мен шетелден келген салалық және академиялық сарапшылардан құралған қазылар алқасының алдында өтті. (Қазылардың есімдері кейін қосылады.)

CASE-IN чемпионаты тек инженерлік білім мен талдау қабілетін ғана емес, сонымен қатар болашақ маман үшін маңызды дағдыларды дамытады: топпен жұмыс істеу, өз идеяңды нақты жеткізу және өндірістік ортаға бейімделу. Бұл жарыс – кәсіби дамуға жасалған нақты қадам, жетекші жұмыс берушілердің назарын аудартуға, тағылымдамаларға жолдама алуға және ғылым мен өнеркәсіп болашағын қалыптастыратын кәсіби қауымдастықтың мүшесі болуға мүмкіндік береді. Осы тұрғыдан алғанда, CASE-IN – инженерлік әлеуетті ашуға және заманауи білім беру әдістерін практикада қолдануға арналған шынайы алаң.

Қазақстанда жартылай финалдың өтуі академиялық және халықаралық әріптестікті нығайту жолындағы маңызды қадам болды. Мұндай іс-шаралар ел университеттерінің жаһандық инженерлік қауымдастыққа интеграциялануына, академия мен өндіріс арасындағы байланысты нығайтуға және инженерлік мамандықтардың беделін арттыруға ықпал етеді. Жеңімпаз командалар чемпионаттың Мәскеуде өтетін үлкен финалына жолдама алып, ТМД елдерінен келген үздіктермен жарысады.

Жартылай финалдың қорытындысы бойынша жүлделі орындар келесідей бөлінді:
1 орын – «Көмірсутек Альянсы» командасы (Е.А. Бөкетов атындағы Қарағанды университеті)
2 орын – «Golden Oil» командасы (Қ. Жұбанов атындағы Ақтөбе өңірлік университеті)
3 орын – «PetroTech» командасы (Аль-Фараби атындағы ҚазҰУ)

Барлық қатысушыларды жоғары деңгейдегі дайындықтары мен креативті шешімдері үшін шын жүректен құттықтаймыз! Оқуда, ғылымда және, әрине, Мәскеудегі CASE-IN финалында жарқын жетістіктер тілейміз!

PhD Абдильдина К.М.