Айқын

Жастар «Ұлт жоспарының» орындалуына белсене атсалыспақ

Жастар «Ұлт жоспарының» орындалуына белсене атсалыспақ Құрылғанына 17 жыл болған ҚазҰУ-дың «Сұңқар» студенттер кәсіподағы Елбасының әрбір Жолдауы мен ел алдына қойған үлкен мақсат-мұраттарына үн қосып, олардың жастар арасында насихатталып, жүзеге асуына белсенді атсалысып келеді.

Кәсіподақ төрайымы Айдана Дәуренқызы елімізде жастардың жан-жақты дамуынан бөлек, жұмыспен қамтылуы үшін бар жағдайдың жасалып отырғанын баса айтумен қатар, 100 нақты қадаммен айшықталған Ұлт жоспарын орындауда жас ұрпақтың атқарар қызметінің жоғары екеніне сенімді.

– Президентіміз Нұрсұлтан Назарбаев: «Жастары жалын жүректі, өршіл намысты, биік рухты болса, ол елдің еңсесі биік»

деп ел жастарына үлкен сеніммен қарап отыр, – деп бастады әңгімесін Айдана Дәу­ренқызы: «Бұл арада «Сұңқар» студенттер кәсіподағы басқа университеттерге үлгі бо­ларлықтай. Біздің зерттеулерімізге сен­сек, басқа университеттерде студенттер кә­сіподақтың не екенін көбіне-көп біле бермейді. Ал «Сұңқар» кәсіподағы – ҚазҰУ жас­тарының қамқоршысы болып отыр. Біз әлеуметтік жағдайы төмен отбасылардан шыққан студенттерге көмек көрсетумен қатар жастарға қа­тысты барлық іс-шара­ларға қаржылай де­меу етеміз. Мәселен, Студенттер са­райында өтетін іс-шара­лар­дан бастап, фа­культеттік деңгейдегі ша­раларға өз үлесімізді қосып келеміз. Ең бас­тысы, Ел­­басымыздың елге сенім ар­тып отыр­­ған Ұлт жоспары аясында көптеген жо­ба­ны жүзеге асырып жүрміз», – дейді.

Бүгінде елімізде 730 мыңнан астам жас кәсіподақтарға мүшелік етсе, оның 230 мыңнан астамы студент жастар екен. Десе де, «Сұңқар» кәсіподағының төрайы­мы жастар арасында құқықтық сауаттың аз­ды­ғына өкінеді. Өз кезегінде ол: «Өкі­ніш­­ке қарай, жастардың өз құқын қорғауда, қан­дайда бір әлеуметтік көмек алуында кә­сіподақтың мүмкіндігі зор болса да, бұл жайлы біліп жатқан студенттер кемде-кем. Ал бұл ұйымдар жастардың басын бірік­тіру­де әрі құқын қорғауда үлкен жұмыс ат­қара алады. Егерде республикалық кәсіподақтарға жастар көбірек тартылса, бәлкім, бұл ұйымдардың жұмыстары да жандана түсер ме еді деп ойлаймыз» дей­ді. Бұдан тыс студенттер кәсіподақтарды рет­тейтін заңдарға кәсіподақ жастары тура­лы толықтырулар енгізу қажеттігін бірауыздан қолдап отыр.

«Сұңқар» кәсіподағы жастардың әлеу­меттік жағдайын шешуге атсалысудан бөлек, ұлттық патриоттық және спорттық-сауықтыру бағытында да үлкен шаралар атқарып жүр. Жұмыс істеп, ақша тапқысы келетін студенттерге арнайы бағдарламалар ұсынылған. Атап айтсақ, «Жасыл ел», Сту­денттер құрылыс отрядтары жас ұрпақтың ертерек жұмысқа тартылып, маңдай термен еңбек етуін үйретіп жүр. Бұл жерде сту­дент­тер арнайы жазылып, үш айлық мерзімде жұмыспен қамтамасыз етіледі.

Ал 22 қыркүйек – Тіл мерекесіне орай ҚазҰУ-дың қара шаңырағында «Бауырсақ party» акциясы өткізіліп, жастардың пат­риот­тық сезімін көтерумен қатар, ана тілімізге деген құрметін арттырып келеді.Бұл күні оқу орнына келген әрбір студент қазақ тілінде мақал-мәтел айтып, бауыр­сақтан дәм татады.

Бір қуантарлығы, ұйым университет түлектерінің жұмысқа орналасуына да мүмкіндігінше жәрдемдесіп, жастардың әлеуметтік және еңбек құқықтарының қор­ғалуы бағытында өз ақыл-кеңестерін аян­бай беріп келеді екен.

Кәмшат ТАСБОЛАТ

http://aikyn.kz/ru/news/show/20689-zhastar_lt_zhosparyny_oryndaluyna_belsene_atsalyspa_