АҚШ-тан келген Джон атай жас түлектің диплом алу кешіне қатысты

Ағаби Әбдусәмедов – ҚазҰУ-дың медицина және денсаулық сақтау факультетін «Жалпы медицина» мамандығы бойынша аяқтап отырған жас түлек. Ол жоғары оқу орнында сабақты жақсы оқып, ұстаздарының көңілінен шыққан ізденімпаз студент атанды. Университетке түскен алғашқы жылдардан-ақ білімге құштар екенін байқатты. Кітапты көп оқыды, әсіресе мамандығына байланысты қосымша еңбектерді іздеп жүріп оқитын студентті ұстаздары дипломын қолына ұстатып, өмір жолына шығарып салды. Қара шаңырақ ҚазҰУ-да бес жыл білім алып, денсаулық сақтау бакалавры дәрежесін алған Ағабидің есінде бұл күн ерекше қалды. Өйткені оны осыдан үш жыл бұрын АҚШ-тың Массачусетс штатына ағылшын тілін үйренуге барғанда құшақ жая қарсы алған Джон Салливан атай арнайы құттықтап келді. Ағаби Джон атайды өзі туып-өскен Түркістанға апарып, көне қаланың тарихи-мәдени жерлерімен таныстырды. Одан кейін Алматыға, Әл-Фараби атындағы Қазақ ұлттық университетіне келіп, Ағабидің диплом алу салтанатты жиынына қатысты.

– АҚШ-қа жұмыс істеп, тіл үйренуге барғанымда алға­шын­да қиындау болғанын жа­сыр­маймын. Джон атаймен та­нысып, табысқаннан кейін өзім­ді жақсы, еркін сезіне бас­тадым. Тілім де шыға бастады. Үш ай ұзақ уақыт емес, десек те, осы аз уақыт ішінде атаймен тіл табысып, достасып кеттік. Мұхит асып, 10 мың шақырым жерден іздеп келген атама құрметім шексіз, өте ризамын, – деді бізбен әңгімесінде жас түлек Ағаби Әбдусәмедов.

Джон Салливан атай да қа­зақ­тың жерін басқанына дән риза. Ол Қазақстан өте көрікті, сұлу мекен екенін тілге тиек етті.

– Алматының тауы өте әде­мі екен. ҚазҰУ кампусы да үл­кен, табиғаты ерекше көз тар­та­ды, – деді әңгіме арасында.

Джон атайдың бірнеше ма­ман­дығы бар. Ол – оқытушы, анимация дизайнері, әртіс. Қо­лы қалт еткенде балаларды қуантуды қалайды. Арасында Санта Клаус болып, бөбектерге қуаныш сыйлайды. Кедей от­ба­­сын, көп  балалы жанұяларды қол­дап, сыйлық бергенді жақ­сы көреді. Мен ол кісіден Аға­би­мен қалай танысқанын сұ­ра­дым.

– Осыдан үш жыл бұрын Аға­­би мен тұратын Кейп-Кодқа (Массачусетс штаты) келіп, ме­німен үш ай бірге тұрды. Сол кез­де ол жұмыс істеп, ағылшын тілін үйренді. Біз өте жақсы тіл табыстық. Ол өте жақсы, тама­ша жас жігіт. Шынымен де со­лай. Ағаби еліне қайтар кезде мен оған «білім алып жатқан уни­верситетіңді бітіргенде се­нің диплом алу кешіңе келемін, өйт­кені сен маған өте қымбат адамсың» дегенмін. Сол сө­зім­де тұрып, мен Қазақстанға кел­­дім. Өзім 1974 жылдан бері ел­ден алғаш рет шығып отыр­мын. Яғни мен үшін саяхатқа шығу – жат оқиға. Сондықтан бұл жақ­қа келу маған өте ерекше әсер етті. Қазақстанды көру – сөзбен айтып жеткізе алмайтын тамаша сезім. Өте әдемі ел екен. Тамаша тарихы, мәде­ние­ті мен өнері ерекше. Ағаби мені айналамен жіті та­ныстырып жа­тыр. Біз Түркіс­тан­да болдық, тағы басқа қа­ла­ларға барып, мешіттер мен кесенелерді, тау-тас, үңгір­лер­ді көрдік. Қазақ­стан­да көп елді мекенді көріп, көп ақпарат ал­дым. Қазақстан сөзсіз керемет ел екен, – деп өз ойымен бө­лісті.

Джон Салливан атай Аға­би­дің диплом алу салтанатына қатысып, ерекше көңіл күйді бас­тан кешірді. Фараби кітап­ханасын көріп, оның әдемі­лі­гіне, бай қорына тәнті болды. «Кі­­тап­хана – өте әдемі, за­ма­науи кейіпте салыныпты. Әрбір оқу орны өз кітапханасының са­па­сы­на қарап бағаланады. Кі­­тап­ханаға қарап, бұл оқу ор­нын мық­ты болар деп ой­лай­мын. Ал Ағабиге сәт сапар, өмір­де үлкен табыс тілеймін. Меніңше, ол кез келген жағ­дай­ды түсінетін, кез келген қиын­шылықтан аман шы­ғатын ақылды жігіт. Мен бо­лашақта Ағаби үлкен жетістікке же­теді деп сенемін», – деген тілегін айтты.

Ал Ағаби өз мамандығын жақ­­сы көретін жас маман. Ол білімін әрі қарай АҚШ-та жал­ғас­тыруды жөн көріп отыр.

– Шетелде алған білімімді кейін елімнің келешек игілігіне жұмсағым келеді. Ол үшін көп ізденіп, көп оқу керек екенін түсінемін. Бес жыл бойы білім алған ҚазҰУ-ым менің азамат болып қалыптасуыма, тәжіри­бе жинауыма өте үлкен ықпал етті. Білім берген ұстаздарыма, зерт­теуші-ғалымдарға ал­ғы­сым шексіз. Мен білімді, білікті оқы­тушылардан сабақ алға­ным­ды мақтан тұтамын. АҚШ-та жұмыс істеп жүргенімде осы кәсіби білімімнің арқа­сын­да екі адамның өмірін құт­қарып қал­дым. Ол кезде мен екінші курс­та оқитын едім. Екіжылдық бі­лім­нің өзі маған сондай дең­­гейде тәжірибе берді. Де­мек, Джон атай да маған текке бауыр баспаған болды ғой, ол менің бойымнан адами ізгі қасиеттерді көрген шығар, – дейді ол.

Біз де өз тарапымыздан АҚШ-тан келген арнайы қо­нақ­қа сәтті сапар тіледік. Қайда жүр­сеңіз де, аман болыңыз, Джон атай!

Гүлзат НҰРМОЛДАҚЫЗЫ