«Болашағы біртұтас ұлт және жалпыға бірдей еңбек қоғамы» атты Республикалық пікірсайыс турнирі ҚазҰТЗУ-да
kazntu.kz: 23.02.2016
Елбасының «Мәңгілік ел» идеясын насихаттау аясында 2016 жылдың 20-21 ақпан күндері студенттік «ТехноКрат» интеллектуалды пікірсайыс клубының ұйымдастыруымен Қ.И.Сәтбаев атындағы ҚазҰТЗУ Ректорының кубогі үшін «Болашағы біртұтас ұлт және Жалпыға бірдей еңбек қоғамы» атты республикалық пікірсайыс турнирі өтті.
Турнирдің басты мақсаты жастардың патриоттық сезімін күшейту, тәуелсіздік құндылықтарын ұлықтау, елжандылыққа баулу, ұлт мерейін арттыру болды.
Турнирге Алматы, Қызылорда, Тараз, Шымкент, Ақтау, Маңғыстау қалаларынан жүзден астам ойыншы қатысты. Екі күнге созылған аталмыш турнирдің бірінші күнінде АПФ (Американдық парламент форматы) форматы бойынша іріктеу кезеңі, ал екінші күні жартылай финал және финал өтіп, ЛД форматы бойынша «Ең үздік спикер» анықталды.
Турнир қорытындысы бойынша ІІІ орынды Алматы қаласы ҚазҰАУ «Сұлтан мен Қожа» фракциясы (Палмағамбет Абылай және Әли Нұрберген), ІІ орынды Тараз қаласы М.Х.Дулати атындағы ТарМУ «Тараз-2000» фракциясы (Сәрсенбек Ақнұр және Бекбауов Салауат), бас жүлдені Алматы қаласы әл-Фараби атындағы ҚазҰУ «Біз ораламыз» фракциясы (Өмірзақ Нұртуған және Тілеубек Динара) иемденді. Сондай-ақ, «Ең үздік спикер» атағы ҚазМемҚызПУ студенті Утемисова Аидаға, ал «Үздік төреші» атағы біздің студентіміз Досан Жасұланға бұйырды. Барлық қатысушыларға арнайы диплом мен қаржылай сыйақылар табыс етілді. Турнир соңында қатысушылар Қ.И. Сәтбаев атындағы ҚазҰТЗУ студенттік «ТехноКрат» интеллектуалды пікірсайыс клубын жоғары дәрежеде өткізген турнирлерімен құттықтап, естелік суретке түсіп тарқасты.
Студенттік бірлестіктер бастамасы мен шараларына қолдау көрсеткен Қ.И.Сәтбаев атындағы ҚазҰТЗУ ректоры Е.Қ.Бейсембетовке алғысымызды білдіреміз.
http://www.kazntu.kz/node/14163
Басқа жаңалықтар
